Краеведениянь кулят «Шкась. Тевтне. Ломантне»

Борис Александрович Серебренников (1915–1989)

Борис Александрович Серебренников академикесь – ХХ пингень пек содавикс учёной-лингвист. Чачсь сон даволковонь 21-це чистэ Архангельской губерниянь (ней областень) Холмогоры ошсо. Эйкакшчизэ ютась Архангельской областень Яренек велесэ. 1930-це иестэ прядызе средней школанть. Теде мейле кармась важодеме.

Серпухов ошонь типографиясо робочеекс. 1931-33-це иетнестэ тонавтнесь Московонь Од келень институтсо немецень келень отделениясо, конадонть мейле кармась улеме переводчикекс. 

1938-40-це иетнестэ прядызе Московонь Историянь, философиянь ды литературань институтсо классической кельтнень ды литературной отделениянть. 

1940-45-це иетнестэ ульнесь Ине Отечественной войнасо.

Войнадо мейле, 1945-48-це иетнестэ, тонавтнесь Московской университетэнь индоевропейской кельтнень сравнительной грамматикань кафедрасо, косо идизе «Общие вопросы теории артикля и семантика артикля в древнегреческом языке» диссертациянзо, конань идеманзо кисэ 1949-це иень даволковонь 14-це чистэ максозель тензэ филологиянь наукань кандидатонь лемесь.

Важодеме кадызь университетэнь теке жо кафедрантень старшей преподавателе. 

1950-це иестэ саезь эрямозо сюлмави СССР-нь Наукань академиянь языкознаниянь институтонть марто. Васня сон важоди научной сотрудникекс, мейле директоронь полавтыцякс. 

1960-64-це иетнестэ – институтонь директорокс, мейле – кармась улеме общей языкознаниянь секторонь прявтокс ды теке марто вейсэ финно-угрань секторонь прявтокскак.

1953-це иестэ Б. А. Серебренниковонь кочкизь СССР-нь Наукань академиянь членэкс-корреспондентэкс. 1956-це иестэ сон идизе докторонь диссертациянть «Категория времени и вида в финно-угорских языках пермской и волжских групп» теманть коряс. 1969-це иестэ сонензэ максозь профессоронь лемесь, а 1984-це иестэ кочказь СССР-нь Наукань академиянь действительной членэкс.

Б. А. Серебренников сюпалгавтызе советской языкознаниянть эсензэ ламо монографиятнесэ, конатнесэ невтевить финно-угрань, тюркань, грекень, албанонь ды лия кельтнень сюпавчит ды историяст.

Сон сёрмадсь истят покш книгат: «Категория времени и вида в финно-угорских языках пермской и волжской групп», «Историческая морфология мордовских языков», «Историческая морфология пермских языков», «Основные линии развития линии развития падежной и глагольной систем в уральских языках» ды ламот лият. Истя жо Серебренников сёрмадсь малав 400 статьят ды вейсэнь книгас зярыя пелькст. Сон ульнесь научной руководителекс ды автортнэнь прявтокс, зярдо нолдасть вейсэнь покш важодевкс – «Общее языкознание». Те покш ученоесь ламо тейсь минек республикасо келень науканть касомасо ды кемекстамосо. Сёрмадсь аволь ансяк книгат, истя жо статьят раськетнень историяст коряс. Б. А. Серебренников лездась «Эрзянь-рузонь валксонть» ды «Мокшонь-рузонь валксонть» анокстамсто, конат лиссть Москов ошсо 1993, 1998 иетнестэ. Сон сакшнось Саранскоев 1970 иестэ.

Ученоенть наукасо покш изнявксонзо неявикст, сонзэ содылизь ды ловилизь инекс аволь ансяк минек масторсо, границянь томбалеяк. Сон ламоксть тейнесь докладт Раськеютконь конгрессо ды симпозиумсо. Борис Александрович ветясь научной покш важодема лия мастортнэсэяк. Сон ульнесь СССР-нь Наукань академиясо языкознаниянь теориянь научной советэнь председателекс, языкознаниянь институтонь докторонь диссертациянь идемань советэнь председателекс, СССР-нь ды Финляндиянь правительстватнень ютксо научно-технической сотрудничествань коряс советской ёнксонь председателекс.

Научной ды общественной тевтнень топавтоманть кис казезель зярыя орденсэ ды медальсэ. Б. А.Серебренников содась ламо кельть, лововсь полиглотокс. Сон эрзякс ловнось К. Абрамовонь, А. Куторкинэнь, мокшокс – И. Девинэнь, П. Левчаевень.

Ученоесь кадсь мельганзо ламо тонавтницят – наукань кандидатт ды докторт, конат важодсть общей, финнэнь-угрань ды тюркань языкознаниясо Россиясо ды омбо масторсо.