Краеведениянь кулят «Шкась. Тевтне. Ломантне»

Медьковонь 26-це чистэ топодевельть бу 85 иеть эрзянь поэтэнтень Юрий Иванович Исланкиннэнь. Чачсь сон Ицял ёнксонь Од Ицяло велесэ.

Тонавтнесь Ардатовань культпросвет школасо, прядсь велень хозяйствань училища. Важодсь Уралсо асбестэнь заводсо, Ростов ёно – шахтасо. Казахстансо сокась-кепедсь апак токше модат.

Васенце стихотворениянзо сёрмадызе школасо тонавтнемстэ. Самай сестэ редизьгак цёранть валморонь сёрмадома ёрокчинзэ. Юрий Иванович паро валсо ледстнесь эрзянь поэтэнть Илья Петрович Кривошеевень (Илька Морыцянь): «Литературасо сон – кинь невтицям, васенце тонавтыцям. Эрясь Ицялсо, – миненек, одтнэнень, кенкшезэ свал панжадоль. Ламоксть тензэ якинь кудов – эсь стихень невтнеме, кунсоломонзо. Те сон, Илья Петрович, “чумось” – стихс кундавинь, те шкас а кацтаван…»

Юрий Исланкинэнь стихензэ ламоксть лиснесть «Сяткосо», «Чилисемасо», «Эрзянь правдасо». Мордовской книжной издательствасо лиссь «Апак прядо ёвкс» поэзиянь башка книгазо.