Артур Матвеевич Моро (Осипов Афанасий Матвеевич) (1909–1989)

Панжиковонь 11-це чистэ топодевельть бу 115 иеть Мордовиянь заслуженной поэтэнтень Артур Моронень. Чачсь сон Самара ёнксонь Похвистневань райононь Ключовка велесэ. 1922-це иестэ кармась тонавтнеме Вишка Толкан велень сисем иень школасо, конань прядомс тензэ эзь саво – тусь Московов П. С. Глухов – «Якстере теште» газетань редакторось – лездась тензэ прядомс фабрикань-заводонь училища ды кармамс типографиясо наборщикень тевень топавтомо.

1932-це иестэ Афанасий Матвеевич прядызе Московонь государственной киноинститутонть ды кода оператор тейсь кинокартина эрзятнень а шожда эрямодост («В кольце угрюмых крепостей»).

Ине Отечественной войнань иетнестэ ульнесь фронтсо дивизиянь «Вперёд за Родину!» газетань редакторокс. Казезь Якстере Тештень орденсэ ды зярыя медальсэ. 1949-це иестэ прядызе КПСС-нь ЦК-со Общественной наукань академиянть, идесь искусствоведениянь кандидатонь диссертация. Мейле важодсь СССР-нь Сёрмадыцянь вейсэндявксонь правлениясо, А. М. Горький лемсэ Литературань институтсо, Н. П. Огарёв лемсэ МГУ-со, косо ветясь эстетикань курсат.

Сёрмадомо Артур Моро ушодсь 1926-це иестэ. Иень ютазь «Якстере теште» газетасо лиссь эрзянь кельсэ васень стихотворениязо. Ловныцятне лембестэ вастызь поэтэнть «Пурьгинень зэрть» (1931), «Келейстэ кинть» (1932), «Чись раки» (1932), «Эрямонь ким» (1934), «Моран эрямонть» (1945), «Тундо» (1959), «Кенярдома» (1964), «Ветка дуба векового» (1968), «Эрьва ломаненть ули морозо» (1970), «Поздняя любовь» (1973), «Монь ковось – май» (1990) стихень книганзо. Седейс токить поэманзояк «Волганть казнензэ» (1952), «Вастома» (1959), «Иетнень сееремаст» (1964), «Вечкемадо легенда» (1980). Ламо вий путсь «Степан Эрьзя» романонть сёрмадомантень, кона нолдазель уш куломадонзо мейле, 1997-це иестэ.

Кулось А. Моро 1989-це иень якшамковонь 13-це чистэ Московсо. Калмазь чачома велесэнзэ – Ключовкасо.