Краеведениянь кулят «Шкась. Тевтне. Ломантне»

Сентябрянь 14-це чистэ тешксты 85 иензэ Г. В. Илюшин. Сон – педагог, историк, краевед, РСФСР-нь школань заслуженной учитель (1990), МР-нь Дубёнкань райононь почётной гражданин (2002).

Геннадий Васильевич чачсь 1937-це иестэ Дубёнкань райононь Енгалычева велесэ, служащеень семиясо. Прядынзе штурманонь Челябинскоень военно-авиационной училищанть (1958), Мордовской государственной университетэнть (1966).

1958-65-це иетнестэ – тонавтыця, 1965-68-це иетнестэ – «Красный Бор» колхозонь партийной организациянь секретарь, 1968-це иестэ саезь – Енгалычевань средней школань завуч, директор.

Геннадий Илюшинэнь прявтветямонзо коряс теезель 320 тонавтницяс типовой школа-комплекс, кемекстась тонавтыцянь паро коллектив, кона эрясь шкинемань свалшкань вешнемасо. Школасо теезель ловнома зал марто библиотека, радиоузел, фотолаборатория, спортзал, стадион, леднемань тир, налксемань ды географической площадкат, садонь ды теплица марто тонавтома-опытной участка. Эйкакштнэ тонавтнильть стамо, тракторонь ды машинань ветнеме, чувтосто ды кшнистэ эрьва мезень тейнеме. 1988 иестэ Енгалычевань школантень топодсть 125 иеть. Те покшчинтень Илюшин нолдась книга «На широкую дорогу – к свету, к знаниям!». Истя жо те иестэнть панжозель Сурачирень крестьянтнэнь материальной культурань музей.

Енгалычевань средней школась – «Школа года – 1994», «Школа года – 1999», «Школа века» (2001) всероссийской конкурсонь лауреат, казезь дипломсо.

Г. В. Илюшинэнь 2006-це иестэ лиссь омбоце книгазо «Вехи села Енгалычево», козонь пурназель покш краеведческой материал Енгалычево рузонь веледенть, эрицятнеде, сюпав пертьпелькстэнть. Седе тов 2008-це иестэ ловныцятне лембестэ вастызь «Дубёнское Присурье» очеркень пусмонть. Те пусмосонть краеведэсь ванкшнынзе эрзятнень, рузтнэнь ды татартнэнь ламо пингень ялгаксчисэ Дубёнкань Присурьясо эрямост. Книгась лезды содамс седе ламо тиринь ёнксстонть аволь ансяк Дубёнкань эрицятненень, но весе ломантненень, кить бажить содамс мокшэрзянь ёнксонь историядонть.