Родькин Степан Иванович (1918–1944)
Степан Иванович Родькин – мокшень содаф прозаик, СССР-нь писателень
Союзонь член, Великай Отечественннай войнань участник. Сон шачсь псиковонь 10-це
шиста 1918-це кизоня МР-нь Ковылкинскяй райононь Рыбкина велеса. Аделазе
Мордовскяй рабфакть, А. И. Полежаевонь лемса МГПИ-ть. 1939–1940 кизотнень покодсь
Ковылкинскяй райононь Малав велень школаса учителькс. 1941-це кизоня тусь армияв.
Великай Отечественнай войнать пингста тюрьсь вракть каршес лама вастова. Эсь
творчестванц ушедозе стихонь сёрмадомаста. Васенце стихонза лисендсть 1935-це кизоня
«Колхозонь эряф» («Колхозная жизнь») журналть эса. Сонь произведениянза
печатлакшневсть «Мокшень правда», «Комсомолонь вайгяль» газетатнень эса. «Паксяса»,
«Тунда», «Маень пизем», «Шумбрат, марстонь пакся!» стихонзон эса поэтсь няфтезе
мокшэрзянь крайть мазы ширенц, шназень велень трудонь кельги ломаттнень. «Удок,
лефкскязе» стихоц арась христоматийнайкс.
Мокшэрзянь литератураса С. И. Родькин содаф кода прозаик. Сон тяштьсь азкст,
очеркт. 1939-це кизоня Мордовскяй книжнай издательстваса лиссь «Велень расскаст»
(«Деревенские рассказы») сборникоц. Тяза сувасть вете азкст, конатнень эса авторсь
няфнесы войнада ингольдень мокшэрзянь велеть эряфонц.
С. И. Родькин эрясь нюрьхкяня эряф, но сембе сяка мокшэрзянь литературав
путфксоц арась пяк няевикс и эрявикс. Сонь произведениянза занцсихть оцю васта
мокшэрзянь писательхнень произведенияснон ёткса и кельговихть лувихненди.
