Краеведениянь кулят «Пингсь. Тефне. Ломаттне»: Яков Максимович Пинясовонь шачема шистонза 110 кизоти

Мордовиянь васенце народнай писательсь, поэтсь, прозаиксь, драматургсь, Государственнай премиянь лауреатсь Яков Максимович Пинясов шачсь Зубово-Полянскяй аймаконь Кужа велеса 1913-це кизонь 29-це декабрьста. Тяса ётасть сонь идькс пингонь кизонза, тяса сон ушедсь сёрматкшнема васенце произведениянзон. Школать шумордамда меле поладозе тонафнеманц Саранскяень педагогическяй техникумса, тяста ушедсь ломанень оцю киц. Сяльде Яков Пинясов прважафоль Москуву тонафнема редакционно-издательскяй тефненди, сяс мес 1932-це кизоня Мордовияса панжевсь минцень книжнай издательстваньке, эрявсть анокламс тоза кадрат. Москуста мрдась покодема эсь редакциязонк, коста и сявозь Якстерь армияв служама. Армияда меле колма кизот покодсь «Колхозонь эряф» журналса, а сяда тов мокшень кялень и литературань учителькс. Сонь пяк мялезонзоль школань эряфсь, шабатнень ёткса пингонь ётафнемась, сединц петнезь ару вайме инь емла лувихне, сяс и сермадсь тейст сизьгемоньда лама книга, коза сувасть стихонза, азксонза, повестенза и пьесанза. Писательть произведениянза ётафтфт лама лия кяльхненди. Аф стак Яков Пинясовонди максфоль васенда Мордовиянь заслуженнай писателень лем, а тоса – народнай, тя оцюдонга оцю питне марнек творчестванцты, сембе эряфонцты. Ули кода мярьгомс тяфта: сонь тяштьфонзон аpy лихтибрястост симихть сембе лувихне, одс ушеды и кунаркиге сёрмады писательхне и поэттне.

Я. Пинясов эсь произведениянзон эса «Эряфсь панжи» (1933), «Эряфсь аськоляй инголи» (1934) азондсь колхозонь эряфть, культураса сатфкснень колга, ламоц стихонза лемтьфт перьфпяльть мазышинцты. «Тол» (1945) книгати кочкаф войнань кизонь лирикац, 1950-80-це кк. Пинясовонь азксонза, ёфксонза, повестенза и стихонза лемтьфт иттненди. Нят «Кода Гришка якась Москуву» (1949), «Акша орнят» (1958), «Эрек лихтибря» (1983) и лият. Шабатненди пяк кельговсть «Эрек толнят» (1956), «Лямбе варяганят» (1959) книганза, маштсь сон иттненди тяштема, сонцень фалу иденнель ваймоц – ару, валда, сяс произведениянзовок эждихть, таколфтыхть, синь смузюфт и козят содержанияс коре.

Содазь мокшень писательть аф аньцек эсь республикасонк, содазь сонь и лия масторонь эряйхне. Тостонь иттненди лувондомс ульсь печатлаф «Кода люпштавсь ватракшсь» азксоц.

Я. М. Пинясовонь произведениянза кармайхть эряма лувихнень седиса, лездыхть оттнень тонафнемаса и касфтомаса, сяс катк фалу валдста цифторды сонь писателень толняц.