Краеведениянь кулят «Пингсь. Тефне. Ломаттне»: Виктор Михайлович Лобановонь 75-це кизонцты

10-це майста 2025-це кизоня топоди 75 киза шачема шистонза сявомок Россиянь писателень Союзонь членти, Мордовия Республикань заслуженнай работникти Виктор Михайлович Лобановонди. Шачсь сон 1950-це кизоня Кадошкина аймаконь Пойвеле велеса. Школада меле тонафнесь Мордовскяй госуниверситетонь мокшень кялень и литературань отделенияса, Москуса Горькаень лемса Литературнай институтса. А меле мрдась Саранскяи. Покодсь телевиденияса и радиоса, «Мокша» журналса.

1989-це кизоня марстонь сборникса лиссть стихонза. Книгати лемкс арасть «Лядомс ломанькс» Виктор Лобановонь стихотворениястонза валхне, конат тердихть сембонди улемс Ломанькс. Виктор Михайлович ульсь природань кельги ломань, кельгозе сембе перьфпяльть. И тя пяк лац няеви-шарьхкодеви «Калонь кунциень» азксонзон лувомста. Сёрмады лямбоста, седиень токазь. Нинге фкя книгац – «Шкаень толня», ушедозе эряфонц 2000 кизоня, эзонза сувасть стихт и проза, сёрмадсь лама очерк и юмористическяй азкс. Тёждяста лувови «Эрян надиязь» сборникоц. Мекольце книгац – «Г. И. Пинясовонь шкайгиц» лемтьф ялганцты, содаф писательти Григорий Пинясовонди. В. М. Лобановонь книганза ванфтовихть минь библиотекань фондсонк и занцихть няевикс васта мокшэрзянь литератураса.