Финно-угроведсь, педагогсь, филологиянь наукань кандидатсь (1970), доцентсь (1978), Мордовия Республикань Государственнай премиянь лауреатсь (1999) В. М. Имярековась шачсь 1933-це кизонь 28-це декабрьста Самарскяй областень Хворостянскяй райононь Чувичи велеса, мокшень семьяса. Шумордазе Зубунь педагогическяй училищать (1953), меле Н. П. Огарёвонь лемса Мордовскяй государственнай университетть (1958), Научно-исследовательскяй институтонь аспирантурать (1970).
1958–1963-це кизотнень Валентина Михайловна покодсь Республиканскяй краеведческяй музейса старшай научнай сотрудникокс, 1963–1972-це кк. ульсь научно-исследовательскяй институтонь мокшэрзянь кялень секторса старшай научнай сотрудникокс. 1972-це кизоста сявомок 2005-це кизоти молемс Н. П. Огарёвонь лемса МГУ-нь филологиянь факультетонь мокшень кялень кафедраса васенда старшай преподавателькс, а меле доцентокс. Сон шарфнесь мяль кялень тяфтама разделхненди, кода лексикологиясь, морфологиясь и синтаксиссь. Тяштсь 50-да лама научнай и научно-методическяй исследования, лия авторхнень мархта марса тяштсь мокшень грамматикат и валкст нят: «Грамматика мордовских языков» (1980), «Лексикология мордовских языков» (1983), «Мокшень кяль. Морфология» и лият. Стане жа сон сувась школатненди мокшень кялень учебниконь авторхнень ёткс. Валентина Михайловна лувсь синтаксисть коряс лекцият, вятсь спецкурст и спецсеминархт, ульсь вятикс курсовой и дипломнай тефненди.
Смузю, тевонь содай педагог и наставник, эсь вельденза няфнезе мокшень кяльти кельгомать и ванфтомать. Панжада вайме и лямбе седи ломань, тонафнихненди виде кинь няфти и цебярь мялень-арьсемань максыель.
Казьф Мордовия Республикань Государственннай Собраниянь Почётнай грамотаса.
