Валентина Ивановна Канаевась – журналист, краевед, театровед, Мордовия Республикань культурань заслуженнай работник.
Шачсь сон Инсар аймаконь Лухменскяй Майдан велеса. 1944-це кизоня аделазе Инсар ошень педагогическяй училищать, сяда меле поладозе тонафнеманц Москувонь библиотечнай институтса, конанц шумордазе 1948-це кизоня. Меле тонафнесь Мордовскяй государственнай университетонь филологическяй факультетса. Аф ламос семьянц мархта эрясь Дальняй Востокса, коста мрдась Инсар ошу 1955-це кизоня.
1955-це кизоста сявомок и 1980-це кизоти молемс покодсь «Ленинский путь» газетать редакцияса отделонь оцюнякс, сяда тов СПТУ-нь директоронь заместителькс, райсоветонь исполкомонь культурань отделонь оцюнякс, ульсь Инсарса народнай театрань режиссеркс.
1980-це кизоня сотозе эряфонц краевдениять мархта – тонафнезе XIX–XX-це веконь мокшень масторть культурань историянц Москувонь, Ленинградонь, Краснодаронь, Пензань, Саранскяень, Ульяновскяень библиотекава и архивга. Кемготува кизонь покодеманц коряс ульсь нолдаф рукопись, кона панчсь лама мезе аф содаф етай пингонь театрать эряфста, няфтсь культураста и образованияста од тонафтыень лепт.
2002-це кизоня Мордовиянь книжнай издательстваса нолдафоль В. И. Канаевать «Высокое служенье малой сцене» очерконь книгац. Валентина Ивановнань лама публикациядонза газетатнень эса народнай театрать прябаланзон колга, а тяфта жа «История Мордовии в лицах» биографическяй сборникса, «Мордовия» энциклопедияса (2003, 2004) и «Мордовия, XX век: культурная элита» энциклопедическяй справочникса (2010, 2013).
Лама питни экспонат и пяк шуроста васьфневи фотография авторсь макссь И. Д. Воронинонь лемса Мордовскяй республиканскяй краеведческяй музейть Инсар ошса отделениянцты.
Цебярьста покодеманкса и лама сатфксонкса казьф медальса и лия казнеса.
Кулось 2005-це кизоня Оренбургскяй областень Орск ошса.
