Мошень содаф поэтсь, прозаиксь, журналистсь, литературоведсь, Россиянь Писателень союзонь членць, филологическяй наукань кандидатсь Семён Аверьянович Самошкин шачсь 1-це февральста 1915-це кизоня Потьманя велеса Зубово-Поляна аймакса. Сон шумордась педучилища, пединститут, аспирантура.
Покодсь школаса, книжнай издательстваса, «Якстерь галстук» идень журналса, «Мокшень правда» газетаса… Лиякс мярьгомс, эряфть содазе лац и сембе ширде. Сяс и тяштьфоц-тифоц кельговсь ломаттненди, лездсь кисост-янцост.
Васенце сборникоц лиссь 1945-це кизоня. Сяда тов сон аноклась и нолдась стихонь и очерконь лама книга: «Эряфть юроц», «Павазонь тяште», «Эрьгя», «Виияма», «Валда толхт» и стак тов. Кой-конат ётафтфт рузонь кяльти.
Мокшень кяльс ётафтозень А. Пушкинонь, Н. Некрасовонь, И. Крыловонь, М. Исаковскяень, С. Михалковонь и лия содаф писательхнень и поэттнень произведенияснон. Лиссь романоцка – «Аф авань тефт» лем ала и оцю монографияц − «Мокшэрзянь идень литературась».
С. А. Самошкин пара мяльса тяштсь шачема-касома ширть колга, няфнезе-шназе перьфпяльть, Родинати служамать, сонь араламанц и ванфтоманц колга, ломанензон мазыдонга мазы потмоширеснон, вийснон-эрьгаснон лангс шарфнесь оцю мяль. Лама масторга арнесь, мезе васьфнесь и няйсь – семботь нолязе-ётафнезе седиенц пачк и пачфнезе тя козяшить лувиензонды.
