Краеведениянь кулят «Пингсь. Тефне. Ломаттне»: Михаил Андреевич Кяшкинонь 105-це кизонцты

Мокшень содаф писательсь – фронтовиксь Михаил Андреевич Кяшкин шачсь 20-це октябрьста 1921-це кизоня Ельникова аймаконь Мокшень Пашад велеса крестьянонь семьяса. Шабакскиге пяк кельгозень книгатнень, мялецоль арамс учителькс, сяс школать аделамда меле тусь тонафнема педучилищав. Арьсемац ётась эряфс. 1938-це кизоня, шумордамок тонафнемать, сон кучфоль покодема вели учителькс.

1940-це кизоня Михаил Кяшкин тертьфоль Якстерь Армияв. Службанц ушедозе Белоруссияса. Войнась апак учсек сувась эряфозонза. Ниле кизот якась-кялендсь толса плхтаф китнень ланга, аф весть ранендафоль, аньцек эряфти оцю кельгомась фалу путнезе пильге лангс. Войнаса няфтезе эсь прянц кода афкуксонь герой, тюрсь врагть каршес прянь апак ужяльтть, тяста няеви мокшень церать пефтома кельгомац эсь шачема-касома ширенцты, ломанензонды.

Улемок фронтса, тяшнесь стихт, очеркт войнать колга, конатнень воиттне лувондозь газетаста. Мартста, 1945-це кизоня, стакаста ранендафоль и кучфоль куду.

Аф ваномок шумбрашинц лангс, кармась покодема «Мокшень правда» газетаса, тяса крхкаста няфтезень эсь содамошинзон. Кода вии журналист, сон пяк сидеста сёрматкшнесь республиканскяй газетав и журналу.

«Мокшень правдаста» Михаил Андреевич ётась радиокомитету литературно-драматическяй вещаниянь редакторкс. Оцю лезксоцоль мокшень и эрзянь кулянь нолдайхнендивок, лезнесь сембонди, нльне рузонь кялень передачань вятихненди.

Эсь васенце рассказонц «В ветряную ночь» М. Кяшкин нолдазе «Колхозонь эряф» журналса 1938-це кизоня.

Тяка жа журналса 1940-це кизоня печатлафоль «Тюрема» («Борьба») повестец. Покодемок редакторкс, Михаил Андреевич ашезе юксне писателень тевть. Сядонга пяк вишкомсь сонь творчествац войнада меле.

Кода писатель, сон тись оцю тев, васенцекс мокшень литератураса сёрмадозе земляконьконь Михаил Петрович Девятаевонь легендарнай подвигонц, конань ся тиезе Великай Отечественнай войнать пингста. «Курссь − Родинась» повестсь лиссь башка книгаса. Михаил Андреевич аноклась пцтай документальнай картина.

Мордовскяй книжнай издательстваса лиссть М. Кяшкинонь «Эряфть кельгомац» (1951 к.), «Цёфксне морайхть» (1958 к), «Мзярда перьфкат ялгат» (1962 к.), «Тяшттне ваныхть Мокшети» (1963 к.) книганза.

Лувихненди тяфта жа содафт азксонь сборниконза: «Мзярда перьфкат ялгат» (1962 к.), «Когда вокруг друзья» ‒ рузонь кяльса (1967 к.), «Толонь пачк» (1971 к.), «Толонь вармать каршес» (1983 к.), конат лиссть ефси куломдонза инголе.

1983-це кизоня Михаил Андреевич тусь эряфста. Ашезь кенерь педа-пес пачфтемс эсь тевонзон, мялензон-арьсеманзон.

Куломдонза меле Мордовскяй книжнай издательстваса лиссь писательть «Возвращенное счастье» (1988 к.) мекольдень книгац рузонь кяльса. Сонь эсонза авторсь азонды Брестскяй крепостть аралаензон колга.

Тячемс Брест ошень музейса ванфневихть Кяшкинонь произведениянза, снимканза, паршиенза. Повестенза, азксонза мзярдонга аф нардавихть лувихнень мяльста. Писательть сембе сатфксонза, путфксонза, пара тевонза эряйхть мокшэрзянь литератураса, а «Курссь − Родинась» и кой-кона азксонза сувасть школьнай программатненди, тонафневихть школаса.

Лама киза цебярьста покодеманкса, общественнай эряфса оцю тевонь кандоманкса Михаил Андреевич Кяшкин казьф Мордовскяй АССР-нь Верховнай Советть Президиумонц колма Почетнай грамотаса, КПСС-нь обкомть и МАССР-нь Министрань Советть Почетнай грамотаса, телевидениять и радиовещаниять коряс СССР-нь Государственнай комитетть Почётнай грамотаса. Сонь лемоц и творчествац ащихть васенце вастса мокшэрзянь литератураса.