Кда корхтамась ушеткшни мокшэрзянь содаф ломаттнень колга, а сембода пяк эста, мзярда кепсевихть литературать, критикать колга кизефксне, васенцетнень ёткса лятфневи и Мария Малькинась – педагогсь, литературоведсь, критиксь, поэтсь.
М. И. Малькина шачсь Ковылкина аймаконь Малав велеса 1944-це кизонь 14-це январьста, тонафнесь Зубово-Полянскяй педагогическяй училищаса, Мордовскяй университетса, конань аделамда меле кемонь кизот школаса вятсь мокшень и рузонь кялень и литературань урокт. Сямольде 1994-це кизоть самс покодсь Мокшэрзянь научно-исследовательскяй институтса, аноклась кандидатскяй диссертация «Мордовское стихосложение», конац башка книгакс лиссь 1996-це кизоня. Сяда тов лиссть литературань антология «Мезе тейнек эряви» (2001), литературно-критическяй сборник «Эряфть вайгялец» (2005). 1998-це кизоня Таллинца нолдаф «Ниле ават – ниле морот», коза сувасть ниле мокшэрзянь аватнень произведениясна.
М. И. Малькина лама статьянза мокшэрзянь литературать колга, конат лисендихть журналса, газетаса и марстонь сборникова, а тяфта жа мокшень кяльть коряс нолдась тонафнемань книгат. 1994-це кизоста сявомок 2009-це кизоти молемс покодсь «Мокша» журналса, ульсь главнай редакторкс. Мария Ивановна кунара ни аф покоди, но сембе сяка кирде кеме соткст мокшэрзянь литературать мархта.
