Краеведениянь кулят «Пингсь. Тефне. Ломаттне» Фёдор Иванович Петербургский (1890–1962)

Фёдор Иванович Петербургский – языковед, педагог, общественный деятель. 22-це апрельста топодсь 135 киза шачема шистонза. Сон шачсь 1890-це кизонь 22-це апрельста Краснослободскяй аймаконь Сире Сендру велеса.

1907-це кизоня начальнай школать аделамда меле тусь тонафнема Казань ошу учителень семинарияв. Колма кизода меле ётась работама Голицинав, кемголмува киза покодсь тостонь школаса, сяда тов фкя киза кенерсь работамс учителькс и школань инспекторкс эсь шачема велесонза. Тоста и сявозь работама Пензав – стане жа инспекторкс, но марнек губерниянь школатненди. 1928-це кизоня ётась эряма Саранскяи.

Афкуксонь наукань кити шаркстась 1931-це кизоня: сон примафоль Языкознаниянь Москувонь научно-исследовательскяй институту. 1933-це кизоня арась лингвистическяй наукань кандидатокс. Сяка кизонь майста сявомок 1937-це кизоти молеме сон работась старшай научнай сотрудникокс культурань Мордовиянь институтса.

Фёдор Иванович Петербургскяень лемоц сувась мокшэрзянь ся учёнайхнень ёткс, конат васенцетне ушедсть латцема мокшень и эрзянь кяльса грамматикань нормат. Сон лама тись кялень васенце конференциятнень анокламаса и ётафтомаса. Оцю мяль шарфнесь орфографическяй литературнай норматненди, мокшень кяльса терминологияти, тяштсь, учебникт мокшэрзянь школьникненди.

Ученайть кядь алда лиссть школаса тонафнихненди учебникт: «Букварь» (1932), «Букварьда меле васенце книга» (1932), «Букварь идень школаса тонафтомс» (1934), «Мокшень кяль. 2-це кизонди тонафнемс книга» (1932), «Элементарнай грамматика. 1-це пялькссь. Начальнай школаса 3-це класса тонафнемс» (1934), «Элементарнай грамматика. 2-це пялькссь. 4-це кизоня тонафнихненди» (1933), «Мокшень кяль. Грамматикань васень сведеният. 1-це и 2-це кизонди» (1933), «Мокшень грамматика. Васенце пялькссь. Морфология. Средняй школань 5-це класса тонафнемс» (1934) и лият.

Кода литературнай критик, сон тяштсь лама статья «Стихонь сёрмадомать колга».

Учёнайсь ашезь ащекшне ширеса социальнай марстонь тефнень эздовок: 1925–1926-це кизотнень кочкафоль Пензенскяй Советонь губисполкому, 1926–1927-це кизотень – областьса просвещениянь работниконь союзу, 1929–1931-це кизотнень – Саранск ошень Совету. Сямольде работась рузонь кялень учителькс Узбекистанонь Каган ошса, Азербайджанонь Нухи ошса.

1946-це кизоня Ф. И. Петербургский мрдась Саранскяи, покодсь пединститутса, филологиянь кафедраса.

Кулось Фёдор Иванович Петербургский 1962-це кизоня.