Краеведениянь кулят «Пингсь. Тефне. Ломаттне»: Фёдор Фёдорович Пьянзинонь 85-це кизонцты

10-це июньцта топоди 85 киза шачема шистонза сявомок мокшень содаф писательти Фёдор Фёдорович Пьянзинонди.

Ф. Ф. Пьянзин лувихненди содаф кода повестень, а тяфта жа ёмла жанрань произведениянь сёрматкшни. Тушендыхть мяльс сонь азксонза, новелланза, юморесканза, сяс мес эсост лац няфневи ётай пннгонь и тяниень эряфсь, ломаттне. Пяк удалафт велети лемтьф произведениянза.

Шачсь Фёдор Пьянзин 10-це июньцта 1940 кизоня Мордовия Республикань Сире Шайгав аймаконь Сарга велеса. Средняй школать аделамда меле тонафнесь Саранскяйса строительнай училищаса, сяльде работась арматурщикокс, слесарькс, учителькс и сяка пингть заочна тонафнесь Мордовскяй государственнай университетса.

Лама киза Ф. Ф. Пьянзин макссь журналистонь тевти, ульсь ответственнай секретарькс «Трудовая правда» Старошайговскяй, «Призыв» Лямбирскяй, «Заря» Кочкуровскяй районнай газетатнень эса, редакторкс «Резинотехника» заводонь «Трибуна рабочего» лама тиражнай газетаса. 1968-це кизоста сявомок, тонафнесь Москуса М. Горькаень лемса Литературнай институтса, конань аделамда меле меки мрдась Мордовияв и тага кярьмодсь журналистонь тевти. Покодсь «Мокша» журналса.

Мордовскяй книжнай издательстваса лисендсть писательть «Кда кенерят поездти…», «Мук эряфса вастцень», «Васедемат», «Азк аньцек видеть», «Седить тердеманц коряс» азксонза, конатнень эса авторсь няфнесыне велень и ошень ломаттнень аф тёждя эряфснон, синь кельгомаснон, пичефксснон и кеняртькшнемаснон. Кулось Ф. Ф. Пьянзин 2014-це кизонь 16-це октябрьста.