Краеведениянь кулят «Пингсь. Тефне. Ломаттне»: Елена Ивановна Азыркинать шачема шинцты

2025-це кизонь 14-це октябрьста шачема шиц Елена Ивановна Азыркинать – филологиянь наукань кандидатть, М. Е. Евсевьевонь лемса Мордовскяй государственнай педагогическяй университетонь родной кялень и литературань кафедрань доцентть, содаф литературоведть, критикть, Мордовия Республикань высшай школань заслуженнай работникть, смузю и мазы мокшень авать.

Елена Азыркинась шачсь Инсар аймаконь Кацятов (Кочетовка) велеса. Школать шумордамда меле тонафнеманц поладозе Саранск ошень Н. П. Огарёвонь лемса Мордовскяй государственнай университетонь филологическяй факультетса. Аделамок университетть, Елена Ивановна покодсь рузонь и родной кялень и литературань учителькс Инсар аймаконь Пойвелень школаса. Шабатнень ёткса покодемась, университетонь аспирантураса тонафнемась сядонга кемокстазь мокшэрзянь литературати кельгоманц. 1996-це кизоня сай пингонь критиксь-литературоведсь аралазе «Ломанць и перьфпяльсь мокшэрзянь прозаса» темать коряс кандидатскяй диссертациянц и сотозе тонафтомань кинц М. Е. Евсевьевонь лемса МГПИ-са (тяни МГПУ-нь) тонафнихнень мархта, коса тячемс покоди.

Учёнайть путфксоц мокшэрзянь литературати пяк оцю. Сон тяшни школатненди и вусненди учебникт и хрестоматият, лама монографиянь автор, сонь лезксонц-анокламанц вельде вузса ётафневихть васедемат эряфкшу писательхнень, од авторхнень мархта. Общественнай эряфсонга Елена Ивановна тиенди аф кржа, ламоксть улендсь делегатокс Мокшэрзятнень оцю пуромкссост. Елена Ивановна кирди ялгань кеме соткст ламоц творческяй ломаттнень мархта. Нят − Мордовияса и лия республикатнень эса содаф прозаикт, поэтт, литературоветт, сяс сонцьке фалу ащи вешемань ки лангса, лама вий и эрьгя путни учёнайсь творчествати, сембе мокшэрзяннети − шачема кяльти, народоньконь козя обуцянзонды, коензонды-крданзонды.

Елена Ивановна сувси инь цебярь авторхнень ёткс, конат тяштсть учебникт-хрестоматият Мордовиянь школатненди. Лама киза сувсесь Мордовия Республикань Образованиянь министерствань экспертно-методическяй советти, примси участия мордовскяй литературать коряс республиканскяй и межрегиональнай олимпиадатнень ётафтомаса. Елена Ивановна кирди соткст национальнай театрать и А. С. Пушкинонь лемса библиотекать мархта.

Кельгома Елена Ивановна, библиотекань покодихнень эзда примак седи ваксстонь лямбе валхт. Арьсетяма тейть кеме шумбраши, авань паваз, оцю сатфкст творчествасот и кельгома тевсот! Катк эряфсот васьфневихть аньцек цебярь и ару вайме ломатть, а сёксеце ули лямбе и валда!