Краеведениянь кулят «Пингсь. Тефне. Ломаттне»: Анатолий Фёдорович Ежов (1941–2012)

Мордовия Республикань заслуженнай писательсь, МАССР-нь культурань заслуженнай работниксь Анатолий Фёдорович Ежов шачсь 1941-це кизонь октябрть 10-це шистонза Зубова аймаконь Польдяз велеса.

Аделазе Н. П. Огарёвонь лемса Мордовскяй университетть филологическяй факультетонц. Лама киза покодсь «Мокшень правда» газетаса, Сире Шайгавань и Лямбирень районнай газетатнень эса, МАССР-нь Телевидениянь и радиовещаниянь государственнай комитетса председательти васенце заместителькс, МАССР-нь печатень и информациянь министркс, «Якстерь тяштеня» идень журналса главнай редакторкс. Сон сувси Россиянь Писателень и Журналистонь союзу, казьф «Знак Почета» орденца.

А. Ф. Ежов – содаф идень поэт. Стихотворениянза тяниень пингти лисендихть газетаса и журналса, ламотне эздост сувафтфт начальнай классонь тонафнема книгатненди. Иттненди лац содавихть «Тяштенят – сиянь пяштенят» (1975), «Ялганязе – варманясь» (1977), «Касы веленязе» (1984), «Азбукась стихса» (1986), «Ляйнянь азор» (1987), «Цёфксонь ёфкст» (2009) книганза.

Анатолий Фёдоровичень творчествац занци няевикс васта мокшэрзянь литератураса. Сонь поэтическяй мазы валса серматф произведениянза токсесазь емла лувихнень седиснон, кошярясазь арьсема и цебярь тевонь тиема.

Кулось А. Ф. Ежов 2012-це кизонь 2-це октябрьста.