Алексей Иванович Карасев (1910–1980)
Мокшень поэтсь, прозаиксь, СССР-нь Союзонь писателень членць, Великай Отечественнай войнань участниксь Алексей Иванович Карасев шачсь 1910-це кизоня 12-це мартста Пенза ошень Белинскяй аймаконь Карсаевка велеса сокаень-видиень оцю семьяса.
Сермадома ушедсь одста, но кяль валонь вийть сяськомац сась аф пяк курокста. Васень стихонза ульсть сиде моронят. Поэтсь корхнесь: «Мон аф шта арьсекшнесайне стихонь строчкатнень, мон синь амолясайне седиень и ёнень мялямстон. Но мялямста тарксефть лангс ванан тячиень ванфса…»
1939-це кизоня прьмаф СССР-нь Писателень союзу.
Алексей Иванович ётазень войнань стака кизотнень. Войнада меле покодсь Пензань газетаса, телевиденияса, вятсь од литературань юромня. Ся кизотнень лиссть стихонь тяфтама сборниконза: «В краю дубрав» (1956), «Золотая нива» (1958), «Песни золотой сосны» (1963), «Снег на яблонях» (1966), «Дубравные дети» (1971), «Родниковый воздух» (1978). Печатлафтольхть прозань книганза – «Берёзовое лето» (1961), «Стешина сирень» (1961).
Мекольдень кизотнень А. И. Карасев лама покодсь, аноклась од сборник. Лемоцка ни аноколь – «Люблю вас». Кода сонць корхнесь, тя ули поэзиянь оцю азкс содафонзон, ялганзон колга, конатнень ёткса эрясь, лама арьсекшнесь сай пингть колга. Книгасонза оцю васта занцихть мокшэрзянь эпость эзда ётафтф стихне. Но тя ушетф тевсь лядсь апак шумордак.
1980-це кизоня июль ковста писательсь кулось.
