Пётр Иванович Левчаев (1913–1985)
Пётр Иванович Левчаев шачсь 1913-це кизонь 1-це мартста Зубово-Полянскай райононь Паранза велеса. Сисем кизоса лядсь аляфтома, сяс савсь повфтамс кядезонза анциень кяскавнясь. Беднодемьяновскяй идень кудса тонадсь сёрмас.
1928-це кизоня кучфоль рабфаку. Эсь автобиографиясонза писательсь сермады: «Тонафнема кучемати сяшкава кенярдень, што аноколень ювадемс сембе светти: “Ванода! Исяк яксень сускомонь анама, каннень постуфонь локша, а тячи мон студентан!ˮ» П. И. Левчаев работась велень школаса, «Мокшень правда» газетаса, Мордкизса.
Сяда тов работамс писательти ашезь сав, 1937-це кизоня Левчаев арестовандафоль. Прважазь мянь Енисейскяй Заполярьяв Игарка ошу. Но сталмотне ашезь аерфта писательть литературать эзда. Реабилитацияда меле, 1956-це кизоня, меки кярьмодсь кельгома тевонцты.
Сермадомань кинц ушедозе кода поэт. Васенце стихотворенияц «Тонафнема» ульсь печатлаф 1930-це кизоня «Од веле» газетаса. Но арась содафокс сембонди кода прозаик. 30-це кизотнень лиссть кафта повестенза: «Кяж» и «Сяпи шит». Тага содафт тяфтама книганза, кода «Повесть и расскаст», «Аляшка цёрокш», «Золотань калня», «Мани сёксе». Лама ётафнесь мокшень кяльсь рузонь авторонь произведеният.
1960–1964-це кизонь велеть эряфонцты П. И. Левчаев лемдезе инь оцю произведениянц – «Стирнят-якстернят» романонц. Лиссть васенце кафта книгатне, колмоцеть тяштемс ашезь кенере…
