Якшамковонь 15-це шиста Мордовия Республикань и Российскяй Федерациянь заслуженнай культурань работникти Анна Трофимовна Асташкинати топодсь шачема шистонза 80 киза.
А. Т. Асташкинать лемоц лац содаф республикань эряйхненди. Марнек эряфоц мокшавать сотфоль морамать мархта и сон лама пинге вятезе Кочетовскяй народнай хорть.
Шачсь Анна Трофимовна Кадошкинскяй райононь мокшень Пою велеса. Оцю семьясост сембе морай ломаттельхть: кие-кургса, кие-музыкальнай инструментса. Анна Трофимовнаньге казезе Шкабавазсь мазы вайгяльса, а нинге сон пяк лац морась баянца. Школать аделамде меле сон тонафнесь Л. П. Кирюковонь лемса музыкальнай училищаса, аделамдонза меле работась Кочетовкань школаса музыкань учителькс.
1965-це кизоста сявомок ульсь «Мокшаваня» хорть вятиец. Сон мрдафтозень эряфс юкстаф мокшень моротнень и тиезень синь нинге сяда мялень салайкс. Хорть репертуарса мокшень обрядовай, бытовой, свадебнай морот, сиде моронят. Коллективть содасазь аф аньцек республикасонк, но и лия ошсовок, а стане жа и омба масторса: Финляндияса, Венгрияса, Германияса. Хорсь – Мордовия Республикань Государственнай премиянь лауреат, ламонц концертонь и конкурсонь лауреат.
Анна Трофимовна путнезе коллективти ваймонь пяльксканц, палозь палсь инксонза. Лама вий-эрьгя макссесь сянкса, штоба козя улель хорть репертуароц, мазыхть морайхнень щамсна-карямсна, штоба артисттнень сценать лангс эрь лисемасна ламос мяляфтоволь ваныти.
Аф кунара А. Т. Асташкинась тусь эряфста. Тяниень пингть сонь кельгома тевонц поладсы С. П. Азыркина.
