Краеведениянь кулят «Пингсь. Тефне. Ломаттне»

Александра Николаевна Куликова (1943–2021)

Мороти кельгомась сашенды ломанти идень нюрямста, тядянь лофцть мархта. Тяфта сась тя кельгомась и Александра Николаевна Куликовати – РСФСР-нь и МР-нь народнай артисткати, РСФСР-нь и МАССР-нь заслуженнай артисткати, МАССР-нь культурань заслуженнай работникти, МАССР-нь Государственнай премиянь лауреатти, III степенень орденонь Славань кавалерти, МР-нь Почетнай гражданинтти. Тя кизоня тейнза топодель 80 киза шачема шистонза.

А. Н. Куликовась шачсь 6-це мартста 1943-це кизоня МР-нь Рузаевка аймаконь Куликовка велеса.

Творческяй эсь кинц ушедозе 1962-це кизоня кштимань-морамань «Умарина» Государственнай ансамбльса, ульсь солисткакс.

Эстраднай искусствань всероссийскяй творческяй мастеркойса тонафнемась сядонга кемокстазе, козякофтозе морама маштомошинц. Тяда меле сон аф кржа пинге морсесь «Лайме» эстраднай ансамбльса, конанцты ульсь арьсикс-пуроптыкс и вятикс. Морсесь мокшэрзянь и рузонь народнай, Россиянь и Мордовиянь композиторонь лирическяй и шутендамань морот.

А. Куликова васенце морайсна тяфтама моротнень, кода «Месть таколфтсамак-пичетьфтьсамак?», «Рузонь ярмаркась», «Ширингушне», «Лайме порась». Сембода содафокс арасть «Умарина», «Акша мацинь стаданя», «Сур велесь», «Субботеясь» и «Выйду на улицу» народнай моротне.

Творческяй киц пачфнезе Александра Николаевнань Советскяй Союзонь, а сяда меле Россиянь сембе ошненди. Сон ульсь Россиянь культурань шитнень эса Азербайджанца, Узбекистанца, Туркменистанца, Поволжьянь республикава, Москуса, «СССР-нь народонь ялгаксшись» фестивальхнень эса, Таджикистанца, Киргизияса, Белоруссияса. «Умарина», «Лайме» ансамбльхнень мархта концертонза ётнесть СССР-са, Польшаса, Чехословакияса, Китайса, Финляндияса и лия странаса.

Масторлангса эряй эрь кодама народонь моронь козядонга козя пусмоста сонцень Александра Куликовать седиенц сембода пяк эжнесазь, шарьхкотьф, эсь Родинанц – Россиять, Мордовиять, шачема веленц, сире коеньконь колга моротне. Аф стак васенце дисконцка, конань нолдазе «Мелодия» всесоюзнай фирмась, артискась лемдезе – «Мон кельгса эсь Россиязень».

1989-це кизоня Александра Куликовань эряфонц и творчестванц колга тифоль документальнай фильма «Уледа павазуфт, ломатть».

Мекольдень кизотнень сонь кядялдонза коль сяда сидеста шачендсть авторскяй морот. Таколфтсы кулхцондыхнень седиснон тядяти лемтьф мороц. Туфт мяльс Россияти и футболть коряс чемпионатти лемтьф моронзовок.

Ужяленди, 16-це августста 2021-це кизоня, А. Н. Куликовась тусь эряфста, но сонь мазы моронза фалу кармайхть улема минь седисонк.