2022-це иестэ топоди 100 иеть кода лиссь «Саратовской этнографической сборникесь». Сонзэ редакторокс ульнесь профессорось Борис Матвеевич Соколов. Книгась нолдазель Саратовской губисполкомонь национальной меньшинствань отделэнть ветямонзо ало. Весе материалось алтави мокшэрзянь раськень этнографиянтень ды фольклоронтень.
Икельце валсонть редакторось ёвтни книганть лангсо важодемадонть, кодат Саратовань этнографтнень икеле аштесть кевкстемат сонзэ сёрмадоманть пингстэ.
Седе тов моли Б. М. Соколовонь «Этнографическое изучение Саратовского края» важодемась, конасонть ученоесь максы домка материал те теманть коряс.
Неявикс тарка изданиясонть саи Маркеловонь «Саратовская мордва» важодемась, конасонть авторось полевой материалтнэнь лангс нежедезь, эрьва ёндо, ванны раськенть коензэ-кирданзо.
Книгантень сови Павел Григорьевич Любомиров профессоронть «О важности изучения мордвы» статьязо, конасонть тешкстазель те кевкстеманть покш эрявиксчиденть.
«Саратовской этнографической сборникесь» ули А. С. Пушкинэнь лемсэ Национальной библиотекань фондсо, национальной ды краеведческой литературань отделсэ (6-це этажсо).
