Кизяев Александр Сергеевич (Отяж Кизай) (1951–2007)

Кизяев А. С. чачсь ожоковонь 31-це чистэ Нижней Новгородсо. Служась армиясо. Кишинёв ошонь музыкань училищань вокалонь сольной отделениянь прядомадо мейле важодсь Молдавиянь госфилармониясо. Вайгелезэ – драмань тенор. Анокстась солонь зярыя концертт, программазонзо совавтсь ламо эсензэ морот, вокально-инструментальной миниатюрат, прелюдият. Морот ладсесь Р. Бёрнсонь, Н. Гильенэнь, А. Лупанонь, Д. Самойловонь, В. Боковонь, Н. Рубцовонь стихест лангс. Гастролензэ ульнесть Московсо, Ленинградсо, Харьковсо, Алма-Атасо, Владивостоксо. Кавксть ульнесь авторской моронь Всесоюзной фестивалень лауреатокс – Московсо ды Саратовсо.

Музыкадо башка, сёрмадсь прозаяк: ёвтнемат, ёвкст, новеллат. 1989-це иестэ саезь эрясь Сарансо. Саранонь 20-це школасо пурнакшнось «Лисьмапря» ды «Чиньжарамо» вокало-хореографиянь ансамблят. Сёрмадсь «Пургаз цёрыне», «Пургазонь сёрма» вейке актсо операт. «Пургаз цёрынесь» невтезель муздрамань театрань сцена лангсо. 1995-це иестэ Мордкизсэ лиссь «Бажамот» книгазо, конанть сёрмадызе эрзякс ды алтызе бабанстэнь – Ирина Фёдоровна Суродейкинанень.

Александр Сергеевич Кизяев кулось 2007-це иень якшамковонь 3-це чистэ.