Кирилл Тимофеевич Самородов – Мордовиянь заслуженнай работник, Государственнай премиянь лауреат, писатель, ученай и фольклорист. Шачсь 1910-це кизонь 7-це апрельста Ковылкина аймаконь Од Толку велеса.
Идькс пингстокиге сон ушедсь покодема: ванць жуватат, соксесь мода, витцесь сёра, кодась карьхть, тиендсь шрат, марсесь пянакутт, петнесь частт. Тунда и кизонда лезнесь алянцты, а тялонда тонафнесь васенда эсь велесост начальнай школаса, сяльде Малавса. Саранскяень педтехникумть аделамда меле тонафнесь Москувонь рабфакса.
К. Т. Самородов сембе эряфонц сотозе Мордовскяй научно-исследовательскяй институтть мархта. Тоса 1950-це кизоня шумордазе аспирантурать, 1961-це кизоня арась наукань кандидатокс, 1940‑70-це кизотнень ульсь старшай научнай сотрудникокс, а 1970‑79-це кизотнень кочкафоль фольклорнай секторонь оцюнякс. Институтса сон тяшнезень сембе содаф работанзон и арась учёнайкс, васенда кода критик и литературовед, тоса кода библиограф и фольклорист. Марса лия учёнайхнень мархта Кирилл Тимофеевич аноклазе «Мордовскяй советскяй литературась» колма томса книгать, лама томса мордовскяй народть устно-поэтическяй творчестванц колга монографиять. Самородовонь авторскяй коллективоц кочказень мокшэрзянь эпическяй моротнень, коса азондови народть ингольдень эряфонц колга. Фольклористикати К. Т. Самородовонь лемоц васендакиге сувась кода валмуворксонь, содама ёфксонь, присловиянь, фольклоронь «ёмла формань» кочкай.
1959-це кизоня лиссь «Мордовские пословицы и загадки» книгац, кона ащи кафта пяльксста.
Сембонди содафокс арась сонь «Мордовские народные сказки» книгац. В. Л. Имайкинать мархта 1981-це кизоня нолдась «Календарно-обрядовые песни и заговоры» том, а кизода инголе аноклазе и нолдазе «Мордовская обрядовая поэзия» монографиять. Ня трудонзон эзда няевихть учёнайть. крхка содамошинза и оцю путфксоц мокшэрзянь литературати.
Кулось 1991-це кизоня 7 декабрьста, калмаф Саранскяйса.
