Иван Васильевич Носиковонди – 65 киза - Национальная библиотека им. А. С. Пушкина Республики Мордовия

Поэттне тундать лемдезь кизоти шобдавакс, а сёксеть – илядькс. И кда тундась сргоземань, эрекламань-касомань пинге, то сёксесь урожаень кочкама-прдама, сяс и козя пинге. Мокшэрзянь лама писатель шачсь сёксенда, козя пингста. Етксост и мокшень поэтсь Иван Васильевич Носиков.

Сон шачсь 1959 кизонь 4 сентябрьста Инсарскяй районоиь Адаж велеса. Тястонь средняй школада меле аделазе Зубово-Полянскяй педучилищать, меле – Н. П. Огарёвонь лемса Мордовскяй госуниверситетть. Васенце стихонзон печатлазень педучилищаса тонафнемста «Свет Октября» зубово-полянскяй районнай газетаса, а университетса тонафнемста тяштьфонза кармасть лисендема «Молодой ленинец», «Мокшень правда» газетаса, «Мокша» журналса.

Университетть аделамда меле сон работась «Мокшень правда», «Биохимик» газетатнень эса. Меле тусь служама Советскяй Армияв, ётафтозь Москуву военнай газетань редакторкс. Тоста еявозь «Литературнай Россияв» военнай обозревателькс, покодсь «Красная звезда» газетаса.

Иван Носиков кенерсь нолдамс стихонь сборникт: «Кевня мархта суркс», «Пшкядема васта», «Шумонь пандома пинге», «Время делать добро». Тяда башка, стихонза лисендсть «Литературная газета», «Литературная Россия», «Красная звезда» газетава, «Аврора» журналса, «Поэзия» альманахса и стак тов.

И. Носиков тяшти мокшекс и рузкс. Поэзиясонза лирикась кемоста сотнеф философскяй мяльхнень, пингть и ломанть колга арьсематнень мархта.

Иван Васильевич, шачема шицень мархта! Национальнай и краведениянь литературань отделонь сотрудникне арьсихть кеме шумбраши, опю сатфкст творчествасот. Учтама эздот лама од стихотвореният, конатнень пара мяльса пачфтьсаськ эрь лувити.