Иван Николаевич Прончатов

Иван Николаевич Прончатов содавикс эрзянь поэт. Поэзиязо пек явовиль лиятнень эйстэ тематикань келейчинь коряс. Ёвтызе эсензэ вановтонзо ды мелензэ тиринь раськеденть, эрямосонть од полавкстнэде. Кода поэт-фронтовик, шкинемасонзо седе покш мель явсь Ине Отечественной войнань темантень, домка арсематненень ломаненть эрямонь кидензэ ды лезэвчидензэ лиятненень ды тиринь масторонтень.

И. Н. Прончатов чачсь 1918-це иень мартонь 18-це чистэ Ицял буень Ламбаське велесэ, служащеень семиясо. Тонавтнесь эсензэ велесэ сисем иень школасо, 193-це иестэ мольсь тонавтнеме Саранскоень педагоги­ческой техникумов, косо ушодызе литературань кинзэ. Васенце стихензэ лиснесть «Пионерэнь вайгель» журналсо. Педтехникумонть прядомадо мейле ушодсь тонавтнеме Мордовской госу­дарственной педагогической институтсо, ансяк стака эрямодонть савсь кадомс тонавтнеманть. Аламос важодсь велень школасо учителекс.

1949-це иестэ Прончатов прядызе пединститутонь филологиянь факультетэнть, мейле А. М. Горькоень лемсэ Литературань институтонь аспирантуранть.

Писателенть од шказо ютась Ине Отечественной войнань фронтсо. Ютызе весе войнанть, ульнесь артиллеристэкс, разведчикекс, зярыяксть ранязель. Тюремань кинзэ прядызе Прагасо. Казезь Отечественной войнань 2-це степенень орденсэ, ламо медальсэ.

1946-це иестэ велявтсь кудов. Важодсь «Эрзянь правда» газетань собкорокс, Мордовской книжной издательствань редакторокс, партиянь областной комитетэнь инструкторокс, «Резинотехника» заводсо робочеекс.

«Васень цвет» стихень ва­сенце пусмозо лиссь 1939-це иестэ. Стихтнесэ невтеви 30-це иетнень эрямось. Поэтэсь ёвтни тиринь ёнксонь мазычиденть. Авторонть ёрокчись виевстэ панжовсь военной лириканть невтемстэ. Прончатовонь героесь – те солдат-фронтовик, кона печтизе войнань стакачинть, ванстась тиринь масторонть.

1951-це иестэ лиссь «Стройсэ» стихень пусмозо. Ды тесэяк поэтэсь весе вайгельсэ ёвтни войнадо, солдатонь подвигте. Теде башка, лиссть «Сэняжа» ды «Жернова» стихень пусмонзо.