Имайкина Мария Дмитриевна (1936–2025)

Сундерьковонь 6-це чистэ топодевельть бу иеть 90 иеть филологиянь наукань кандидатонтень, Мордовия Республикань высшей школань заслуженной важодицянтень Мария Дмитриевна Имайкинаннень. Чачсь сон Ицялбуень Ицялвелесэ сокицянь-видицянь кудораськесэ. Ицялвелесэ прядызе средней школанть. 1956-це иестэ Мария Дмитриевна прядызе педучилищанть. Теде мейле поладызе тонавтнеманзо МГУ-нь историянь-филологиянь факультетсэ. Важодсь вейке ие Покш Игнатбуень Спасское велесэ школасо тонавтыцякс. Прядсь аспирантура. Наукасо ветицязо ульнесь Н. Ф. Цыганов. Аспирантурадо мейле Мария Дмитриевна кадовсь университетс. Ловнось «Сопоставительная грамматика русского и эрзянского языков», «Фонетика», «Общее языкознание», «Введение в языкознание» курстнэнь коряс лекцият, тонавтнесь омбомасторонь келень факультетсэ эрзянь кель ды ветясь венгрань кель филологиянь факультетсэ.

1974–1975-це иетнестэ важодсь ГДР-нь Галле ошсо Мартин Лютер лемсэ университетэнь Н. Г. Чернышевский лемсэ славистикань факультетсэ.

1977-це иестэ саезь 1990-це иес эрясь Венгриясо: важодсь Будапештсэ А. С. Пушкин лемсэ Рузонь келень институтонь филиалсо методистэкс. Ловнось лекцият, тейнесь докладт, ветясь рузонь келень коряс спецкурс. Тоско, Венгриясо, Печ ошсо сон ветясь эрзянь кель. Седе тов колмо иеть Сегед ошонь университетсэ ловнось эрзянь келень коряс лекцият.

Мария Дмитриевна тейсь покш путовкс наукаскак. Сонзэ лиссть 70-де ламо наукань ды тонавтомань-методикань важодевксэнзэ, конатнень ютксо улить тонавтнема книгаткак. Сон сёрмадсь ламо наукань важодевкст, ды эрьванть эйстэст лезэзэ ды эрявиксчизэ а онкставикст. Мария Дмитриевна сеть тонавтыцятнестэ, конатнень вечкилизь студенттнэяк, преподавательтнеяк. Весе эрямонзо алтызе тиринь эрзянь келентень, сонзэ ванномантень.

Кулось М. Д. Имайкина умарьковонь 2025-це иестэ.