Мордовия Республикань народнай поэтсь и заслуженнай писательсь, Государственнай премиянь лауреатсь, Российскяй Федерациянь культурань заслуженнай работниксь, мокшэрзянь литературань классиксь Илья Максимович Девин шачсь 1922-це кизонь 20-це июльста Мордовиянь Сире Шяйгавонь аймакса Сире Теризморга велеса, крестьянинонь семьяса.
Сире Шяйгавонь школать аделамда меле, 1940-це кизоня, сон ушедсь покодема корреспондентокс «Мокшень правда» газетаса. 1941-це кизоста сявомок и 1945-це кизоти молемс тюрсь фашисттнень каршес Великай Отечественнай войнаса. Войнада меле покодсь «Мокшень правда» газетаса, «Мокша» журналса. 1971–1984-це кизотнень ульсь Мордовиянь писателень Союзть правлениянцты председателькс.
«Девинонь поэзияц, кода ару лихтибря, коста симат-симат и аф топодят, а ваймонь валдоц и лямбоц сатнесь маластонь и ичкоздень ялганзонды, сембе ломаттненди, конат васетькшнесть кинц лангса. Илья Максимович лац содазе эряфть, перьфпяльть, ломаттнень мяльснон-арьсемаснон, корхтамань козяшить, маштсь валонь азома, штоба сёрмадомс цебярь, сединь токай произведеният.
Васенце стихонза, сиде моронянза лисендсть «Колхозонь эряф» журналса, «Мокшень правда» газетаса 1938-це кизоня. Поэтть лемоц кайгозевсь 1945-це кизоня «Шобдавань заря» стихонь сборникть лисеманц мархта, кона ульсь печатлаф шобда тюсса газетань лопаняс и вешендемок эсь азоронц, ётась пяк кувака ки: Саранск ошста сявомок Берлину молемс.
1969-це кизоня Илья Девин шумордазе арьсефонц: лиссь «Нардише» романць мокшень кяльса.
Оцю васта Илья Девинонь творчестваса занци юморсь, лама сёрмадсь шабатненди: нят стихт, баснят, пародият.
Цебярь койкс арасть Девинскяй лувоматне, конат етафневихть 2004-це кизоста сявомок тяниень пингти самс писательть шачема-касома ширесонза. Тянь сюнеда сон тиезе содафокс эсь веленц, республиканц и народонц. Поэтсь, улема, аф стак шачсь Сире Теризморга велеса, кона келемсь мазыдонга мазы вастса, и коса тя пингс козят национальнай культурась, мокшень койхне-обуцятне, мокшень ваймось. Сембе ня козяшитне сувасть И. М. Девинонь поэзияс, прозас и синь вельдест пачкодсть мокшэрзянь сембе народти. Илья Максимович лама тись мокшэрзянь литературать виияфтомаса. Тя тевонц инкса сон ульсь казьф Трудовой Якстерь Знамянь и Народонь ялгаксшинь орденца, лама медальса. Но инь оцю казнекс теенза ульсь сембе народонь кельгомась. Сон видекс народнай!
А. С. Пушкинонь лемса Национальнай библиотекаса 2022-це кизоня 4-це февральста ушедсь покодема литературнай онлайн-портретсь «Певец страны Сенемас», кона лемтьф народнай поэтть И. М. Девинонь 100 кизонь топодеманцты. Тяса лувовихть сонь произведениянза рузонь, мокшень и лия финно-угрань кяльса. Проектсь кармай молема кизоньберьф.
