Национальная библиотека им. А. С. Пушкина Республики Мордовия

Илларион Сергеевич Сибиряк (Поздяев)

Октябрянь 26-це чистэ топодсть 120 иеть советской партийной важодицянтень, историкентень, фольклористэнтень, профессоронтень (1974) Илларион Сергеевич Сибирякнень (алкуксонь фамилиясь Поздяев).

Чачсь Илларион Сергеевич Саранской уездэнь Старые Турдаки велесэ, ней те Мордовия Республикань Кочкур буе. Раськест Поздяевтнень ульнесь покш. Веженцесь Илларион прядсь церковно-приходской школа, а лиятненень эзь саво тонавтнемс. Модаст ульнесь аламо, секс якасть важодеме ве ёнов. Цёрынентень ульнесть кемень иеть, зярдо сон кармась лездамо покштнэнень.

Поздяевтне ютызь весе Рав чиретнень, пачколесть Уралов, Украинав. Вишка пингстэ Илларион неизе, кодамо покш ды мазый минек масторось, кодат превей ды дока ломанть эрить сонзэ лангсо.

1923-це иестэ Поздяев прядызе Востоконь трудийтнень Коммунистической университетэнть, Якстере профессурань институтонть (1934).

Секе жо иестэнть сон – Пензенской губкомонь национальной меньшинствань отделэнь, Саранской укомонь подотделэнь прявт, 1924-це иестэ – Томской губкомонь мордовской секциянь секретарь, 1925-цетнестэ – ВКП(б)-нь Новосибирской крайкомонь эрзя-мокшонь секциянь ды «Од эрямо» газетань редакциянь прявт.

Сонзэ тевензэ вельде Сибирьсэ ламолгадсть эрзя-мокшонь школатне; советско-партийной школасо ды педагогической техникумсо (Барнаул ош) национальной кадрань анокстамонть туртов панжозельть эрзя-мокшонь отделеният.

Сибкрайиздатсо лиссть Сибиряконь книгазо «В. И. Ленин. Жизнь и деятельность (1870–1924 иеть)», «Восьмая годовщина Красной Армии и задачи обороны СССР» (Новониколаевск, 1926). 1926-це иестэ саезь – губернской Совнацменэнь прявт ды Самарской губононь прявт Сибиряконь лездамонзо вельде панжозельть школат-интернатт эрзя-мокшонь, татаронь ды чувашэнь эйкакштнэнь туртов; Бугуруслансо панжозельть национальной колмо педтехникумт.

1930-це иестэ саезь – национальной меньшинствань уполномоченной ды Средне-Волжской крайколхозсоюзонь орготделэнь прявтонь полавтыця; 1931-це иестэ саезь – «Весень – коллективизацияс» агитпоездэнь ветиця, «За большевисткие темпы» ламотиражонь газетань редактор, Крайкогизэнь директоронь полавтыця ды национальной литературань коряс прявт редактор (Самара ош); 1935-це иестэ – Якстере профессурань институтонь Самарской отделениянь марксизмань-ленинизмань Высшей курстнэнь Российской ды СССР-нь гражданской историянь кафедрань профессор.

1935-36-цетнестэ Мордовской НИИСК-нь историянь, этнографиянь ды фольклоронь секторонь прявт, директор. Аспирантурань ды стенографиянь курсонь, научной библиотекань, институтонь издательской тевень, П. Г. Смидовичень лемсэ Мордовской природной заповедникень панжиця. 1937-це репрессировазь троцкизмасо стяконь чумондоманзо коряс, судязель ИТЛ-с 10 иес пекстамос (1955 реабилитировазь).

1962-це иестэ И. С. Сибиряк важодсь Заполярьянь стройкатнесэ, Норильск ошонь «Стройдеталь» заводонь директорокс. Казезь медальсэ «За доблестный труд в Великой Отечественной войне 1941–1945 гг.».

И. С. Сибиряк кулось январень 21-це чистэ 1984-це иестэ Куйбышев ошсо.