Сундерьковонь 3-це чистэ топодевельть бу 135 иеть эрзянь эрзянь содавикс сёрмадыцянтень, СССР-нь сёрмадеень Вейсэндявксос совицянтень Яков Пахомович Григошинэнь. Чачсь сон Пенза ёнксонь Шемышеень буень Еремеева велесэ. Прядызе Казанень тонавтыцянь семинариянть, Саратовань университетэнть, тонавтнесь МНИИЯЛИЭ-нь аспирантурасо. Важодсь тонавтыцякс, «Якстере сокиця» газетань литсотрудникекс, МНИИЯЛИЭ-нь научной сотрудникекс.
Сёрмадомо Яков Пахомович ушодсь 1920-це иетнестэ. Лиссть «Од велень гайгемат» (1931), «Од вий» (1933), «Колхозонь паксява» (1935), «Поздоровт теть, Мордовия!» (1935) стихотворениянь ды «Толнэ» (1934), «Вирязонь нуцьказо» (1963) ёвтнемань книганзо. Варчнесь виензэ драматургиясояк, сёрмадсь «Ёлкань перька» эйкакштнень туртов вейке актсо пьеса, «Кузьма Алексеев» оперантень либретто.
1938-це иестэ Я. П. Григошин чумовтомо пекстазель. Кулось тюрьмасо 1939-це иень чадыковонь 24-це чистэ. Неень шкастояк ловныцятне содасызь сонзэ кода поэтэнть ды прозаикенть, кона эсензэ шкинемасонзо кадсь домка тешкс ды покш путовкс раськень литературантень, культурантень.
