Ацамковонь 26-це чистэ содавикс эрзянь сермадеентень, журналистэнтень Пётр Семёнович Глуховнень топодевельть бу 125 иеть. Сон истят сёрмадейтнень ютксто, кить эзть капша ламо книгань нолдамо. Сынст бажамост ульнесь вейке – сёрмадомс эрямос кеместэ совиця произведеният.
Чачсь Пётр Семёнович Симбирской губерниянь Буинской уездэнь (ней Чувашия Республикань Батыревской район) Вишка Крамаль эрзянь велесэ сокицянь семиясо. Вишкинестэ кадовсь тетявтомо, сонзэ трицякс-кастыцякс, тензэ оймеёжонь путыцякс ульнесь М. Е. Евсевьев, мокшэрзянь содавикс учёноесь ды просветителесь, аванзо лелясь.
Ушодкс школанть прядомадо мейле Пётр Семёнович тонавтнесь Казанень инородческой учительской семинариясо. Сеть иетнестэ сон ламо яксесь эрзянь ды мокшонь велетнева, пурнась фольклоронь материал. Зярдо Московсо кармась лиснеме «Якстере теште» газетась, сеедьстэ сёрмалесь тов статьят. Кода газетань паро корреспондентэнть, П. С. Глуховонь тердизь Московов РКП(б)-нь ЦК-нь Мордовской секцияв ды кемекстызь «Якстере теште» газетань редакторокс. Теке шкастонть сон тонавтнесь Московонь экономикань институтсо, конань прядомадо мейле кучизь Магнитогорскоев металлургической комбинатонь строямо. Тосо пенсияс туемазонзо важодсь плановой отделэнь прявтокс.
Литературас кинзэ П. С. Глухов ушодызе 20-це иетнестэ. Сонзэ кавто произведениятне – «Кедровой пештть» ды «Варма мельга» ёвтнематне – совасть эрзянь-мокшонь литературань сырнень фондс. Мельстуицят М. Е. Евсевьевде, Ф. Ф. Советкиндэ ды Степан Эрьзядо ледстнеманзояк.
Кулось Пётр Семёнович Глухов 1979-це иень февралень 7-це чистэ. Калмазь Магнитогорскойсэ.
