Национальная библиотека им. А. С. Пушкина Республики Мордовия

Фёдор Петрович Матюшкинонь 70 кизонцты

Мокшень поэтсь и прозаиксь Фёдор Петрович Матюшкин шачсь 1955-це кизоня 14-це январьста Уржа велеса Сире Шайгавонь аймакса. Тонафнесь Вертелимонь средняй школаса, конань аделазе золотань медаль мархта, а 1977-це кизоня шумордазе Мокшэрзянь университетть электроникань и автоматикань факультетонц. И арась мокшень цёрась инженеркс. Колма кизот покодсь Урал ширдень заводса, вете кизот – Саранскяйса телевизионнай, резинотехническяй, «Электровыпрямитель» завоттнень эса.

Фёдор Матюшкинонь васенце стихонза печатлафтольхть «Мокша» журналса. Няевсь − поэтсь лац содасы шачем кяльть, машты мушендомост ломаттнень корхтамаста зрнянь цятконятнень и сувафнесыне стихонзонды.

Коса афоль уле поэтсь, мяльсонза фалу Уржа веленяц. Ларька атянц морамац и Росюня бабанц ёфксонза фкяняньбес ванфтовсть седисонза-ваймосонза и пингонь-пингонь кяльбрястонза прашендыхть седиень эжди стихокс.

Фёдор Петровичень эряфоц пачкодсь стама тёкшс, мзярда эвондакшни мяль варжакстомс фталу и ваномс, мезе и кода тифоль, удалась ли таргамс-такорготфтомс эряфонь кибряса эсь яннянц, катк аф стама келить, катк аф стама ичкози туфть, кодамонь колга арьсефоль инголи. И кда няйсак, што тя яннява тёждяста аськоляй нинге кие-кие лия, то юмай пелемась седистот. И ваймоть, кода менельть, атямъёнгонь тюсне аньцек мазоптсазь.

Минь арьсетяма мокшень смузю поэтоньконди валда кит-ятт, оцю сатфкст творчествасонза, кеме шумбраши и паваз.