Эрзянь раськень сёрмадеентень, драматургонтень, Ине Отечественной войнань участникентень Кузьма Григорьевич Абрамовнень вана уш котоце ие алтавить ловномат. Сынст анокстыцяст-теицяст А. С. Пушкинэнь лемсэ ловнома кудось, Н. П. Огаревонь лемсэ университетэнь филологической факультетэсь, МР-нь сермадеень вейсэндявксось.
Те иестэнть сынст прявт темакс аштить фольклоронь койтне-кирдатне, кода сынь невтевить Кузьма Григорьевичэнь литературной произведениятнесэ.
Ловномань программантень совасть докладт, выступленият, конатнень анокстызь филогической факультетэнь тонавтыцятне ды тонавтницятне, содавикс сермадейтне, библиотекасо важодицятне. Сынст эйсэ домкасто, келейстэ тешкстазь Кузьма Абрамовонь шкинемазо, ваннозь сонзэ произведениятнесэ фольклоронь ёнкстнэнь саемань башка ёнкстнэ, максозь покш литературно-критической анализ.
Библиотекань важодицятне эсест выступлениясост истяжо тешкстызь лия содавикс сёрмадейтнень эрямонь ды шкинемань кист. Содавикс ученойтнень-литератортнэнь материалост лангс нежедезь, толковизь сынст путовксост тиринь литературань чачомасо-касомасо.
Сёрмадеень вейсэндявксонь прявтось Т. П. Мокшанова паро мельсэ кортась од ломантнень туртов ловномс эрзянь ды мокшонь сермадейтнень произведенияст, содамс сынст шкинемаст.
Филологиянь наукань докторось Ю. Г. Антонов эсензэ кортамосо тешкстызе неть ловноматнень эрявиксчист, кодамо сынь кандыть лезэ эрзянь ды мокшонь литературань кевкстематнень ванномасо.
