Ацамковонь 1-це чистэ содавикс финно-угроведэнтень, филологиянь наукань докторонтень Григорий Иванович Ермушкиннэнь топодевельть бу 90 иеть.
Чачсь Григорий Ермушкин Лукоянова ёнксонь Кельдюшева велесэ эрзянь семиясо. Сисем иень школанть прядозь, поладызе тонавтнеманзо Лукояновань педучилищасо, мейле – Арзамасонь Государственной педагогической институтонь филологиянь факультетсэ. Тонавтнемань иетнестэ а весть якась диалектологиянь экспедицияв, конатнень ютавтнесь СССР-нь Наукань академиянь Языкознаниянь институтось. Арзамассо институтонть прядомадо мейле поладызе тонавтнеманзо СССР-нь Наукань академиянь Языкознаниянь институтонь аспирантурасо (1962–1965), ды се шкастонть саезь весе эрямонзо сюлмизе те институтонть марто.
1967-це иестэ Г. И. Ермушкин идизе «Северо-западные говоры эрзя-мордовского языка» теманть коряс кандидатонь диссертациянть.
1984-це иестэ нолдазь «Ареальные исследования по восточным финно-угорским языкам» монографиязо ульнесь сёрмадозь диалектологиянь материалтнэнь коряс, конат пурназельть 1963–1978-це иетнестэ Нижегородской, Оренбургской областтнесэ ды Татарстансо, тесэ истя жо тевс нолдазельть МНИИЯЛИЭ-нь материалтнэ. Те монографиясь нейгак эзизе ёмавто питнейчинзэ, эйсэнзэ невтезь явомась ловови сехте видекс.
Б. А. Серебренников ды К. Е. Майтинская марто вейсэ Г. И. Ермушкин сёрмадызе «Финно-волжская языковая общность» монографиянть (1989). Учёнойтне васенцеде невтизь уралонь кельтнень грамматикань башка ёнксост ды финнэнь-равонь кельтнень сюлмавксост. Григорий Иванович анокстызе финнэнь-равонь кельтнесэ фонетикань процесстнэде пельксэнть.
«Верхнепьянский диалект эрзя-мордовского языка» монографиязо (1991) теезель «Инструкция по единообразному описанию диалектов уральских языков» раськеютконь проектэнть коряс. Верхнепьянской кортавксонть Г.И. Ермушкин кандызе эрзянь келень кортавксонь колмоце типентень, домкасто ванкшнынзе фонетикань, морфологиянь, синтаксисэнь башка ёнкстнэнь.
Лия монографиясонзо эрьва ёндо ванкшнозель среднетешской кортавксось («Среднетешский диалект эрзя-мордовского языка», 2004).
1997-це иестэ Григорий Иванович идизе «Развитие фонетической системы диалектов эрзя-мордовского языка» докторонь диссертациянзо.
Сон ульнесь «Основы финно-угорского языкознания» (1974, 1975, 1976), «Опыт совершенствования алфавитов и орфографий языков народов СССР» (1982), «Мордовский словарь X. Паасонена» нолдавкстнэнь редколлегиянь членэкс, ниле томсо валксонть научной редакторокс. Сёрмадсь малав 100 наукань важодевкст, конатне алтазь эрзянь ды мокшонь кельтненень. Эйсэст кепсесь эрьва кодат ксвкстемат, ютавтсь ареалонь, историянь-типологиянь ванкшномат. Питнейкс лововить важодеманзо, конат невтить-панжить финнэнь-равонь кельтнень фонетикань системаст. Покш мель явсь социолингвистикань, историографиянь ды лия кевкстематненень.
Ламо иень перть Г.И. Ермушкин ульнесь учёной секретарекс, мейле – докторонь диссертациянь идемань коряс специализированной советэнь председателень полавтыцякс, финнэнь-угрань международной конгресссэнь участникекс. Сонензэ максозельть «Почётный гражданин города Хайдусобосло» (Венгрия, 1977) ды «Иностранный член-корреспондент Финно-Угорского общества» (Финляндия, 1984) лемтне.
Наукасо вешнематнеде башка, Григорий Иванович важодсь преподавателекс – ловнось лекцият Мордовиянь госуниверситетсэ, Мордовиянь госпединститутсо, Туркунь университетсэ, тонавтсь рузонь кель Московонь заочной педагогической институтсо, эрзянь ды мокшонь кельтнень – М. С. Щепкин лемсэ Театральной училищань Мокшэрзянь студиясо.
Григорий Иванович Ермушкин кулось 2010-це иень мартонь 3-це чистэ. Сон певтеме вечкилизе тиринь эрзянь келензэ, весе виензэ путсь сонзэ ванстомантень ды седе сэрей тёкшос кепедемантень.
