Ожоковонь 10-це чистэ тешксты юбилеензэ эрзянь сёрмадеесь, Россиянь сёрмадеень Вейсэндявксонтень совицясь Дергачёва Любовь Фёдоровна. Чачсь сон Мордовия Республикань Дубёнкань буень Кочкурвелесэ. 1991-це иестэ прядызе тиринь велень средней школанть, теке жо иестэнть кармась тонавтнеме Н. П. Огарёв лемсэ Эрзямокшонь государственной университетэнь филологиянь факультетэнь эрзянь отделениясо. Сонзэ прядомадо мейле важодсь «Сятко» журналсо литсотрудникекс, «Новая жизнь» Дубёнкань райгазетань корреспондентэкс.
Сёрмадомо Любовь Дергачёва ушодсь школасо тонавтнемстэ. Шкинемазо печатавсть «Новая жизнь» районной газетасо, «Эрзянь правда» газетасо, «Сятко» журналсо лисснесь «Чокшнесь викшнезь сырнень тештьсэ…» стихень покш пурнавксозо. 1995-це иестэ Эрзямокшонь книгань издательствась нолдызе «Вечкемадо» стихень вейсэнь пусмонть, ков совасть Любовь Дергачёвань зярыя стихензэяк.
«Оймесь мородо а чами» (2000) ды «Тонеть» (2017) лиссть валморонь башка пусмокс. Произведениятне эйсэст оймевть, сёрмадозь мазый кельсэ, токить эрьвань седей, сынст кодаяк а човорясыть лия авторонь произведения марто.
Эрзянь поэтессанть стихензэ ютавтозь рузонь, финнэнь, венгрань, мокшонь, коминь кельтнес. Сонськак Любовь Фёдоровна ламо вийть путы лия кельстэ ютавтомань аволь шожда тевентень. Финнэнь-угрань кельтнень парсте содыцянть, американь учёноенть Джак Рютерэнь прявтсо ютавтызе финнэнь кельстэ Арто Паасилинэнь «Покштянь вешнемстэ» романонзо.
Дергачёва Л. Ф. – «Рождественская звезда» пелькстамонь дипломант ды лауреат, сонензэ ульнесть максозь Российской Федерациянь Президентэнть Б. Н. Ельцинэнь ды Мордовия Республикань Прявтонть Н. И. Меркушкинэнь одтнэнь туртов премиятне, истя жо казезель Мордовия Республикань правительствань Шнамо конёвсо.
