Цыганов Николай Фёдорович

Ацамковонь 11-це чистэ топодевельть бу 120 иеть мокшэрзянь келень лексикань тонавтыцянтень, филологиянь наукань кандидатонтень, доцентэнтень, советско-финляндской ды Ине Отечественной войнань участникентень Николай Фёдорович Цыгановнень. Чачсь сон Пензань областень Шемышеень райононь Мачкасы велесэ, эрзянь семиясо. 1916-це иестэ прядызе земствань школанть, 1924-це иестэ – Саратовань губерниянь Петровкань педтехникумонть, вете иень ютазь – Саратовань университетэнть. Университетсэ тонавтнеманть сюлмась «Якстере сокиця» газетасо важодеманть марто, Лебежейка станциясо ладясь таркадо таркас якиця школанть тевензэ.

1929-це иестэ Николай Фёдорович сась Саранскоев. Кавто иеть ульнесь руководящей кадрань анокстамонь коряс школасо завучекс, тонавтсь историянть ды экономиканть. Армиясо служамодо мейле (1930–1932) велявтсь мекев Саранскоев. Сон ладязель Мордовиясо пединститутонь биологиянь факультетэнь прявтокс. Пек бажась эсь содамочитнень ламолгавтомо. Те ветизе сонзэ Ленинградонь университетэнь филологиянь факультетэнь аспирантурав, конань прядомадо мейле (1938) кармась важодеме СССР-нь Наукань академиянь келень ды арсемань (мышлениянь) научной сотрудникекс. Прявтозоль содавикс финно-угроведэсь, СССР-нь Наукань академиянь членэсь-корреспондентэсь Д. В. Бубрих. Сонзэ вельде Цыгановонь сыремсь мелезэ седе домкасто содамс-тонавтнемс эрзянь ды мокшонь кельтнень, ды сестэ саезь эрямонзо прядовомс сон эзь тукшно те кинть лангсто. Аламос явовкшнось эйстэнзэ ансяк войнань шкасто, ков тукшнось эсь олясо. Колмоксть ранязель. Казезель Якстере Знамянь, Отечественной войнань кавонест степенень орденсэ, ниле медальсэ.

Войнасто велявтомадо мейле Николай Фёдорович кучозель келень, литературань, историянь ды экономикань научно-исследовательской институтонть тевензэ ладямо. Теке марто тонавтсь пединститутсо. 1954-це иестэ сон овсе ютась педагогонь тевентень. Секе иестэнть идизе наукань кандидатонь диссертациянзо: «Эрзянь-мокшонь кельтнень лексикань ды лексикографиянь кевкстематне» теманть коряс.

Весемезэ жо Николай Фёдорович кадсь эсензэ мельга лексикань, лексикогафиянь, диалектологиянь ды морфологиянь коряс 50 ламо пек паровиев важодевкст: «Сехте-сехтетнестэ» – «Замечания о явлениях в мордовской лексике» (1947), «Опыт работы над словарями» (1951), «К вопросу об основном словарном фонде мордовских языков» (1951), «Из истории мордовской лексикографии» (1954), «Пути развития словарного состава мордовских языков» (1955) ды лият.

Литературань келенть касоманзо учёноесь сюлмась, васняяк, валксонь улеманть марто, конатнеде, ловсь сон, эряви анокстамс эрьва кодат. Ды сонсь васенцетнень ютксо кундась те меленть эрямос ютавтомо. Истя чачсть «Русско-эрзянский словарь» (1948), «Эрзянско-русский словарь» (1949), «Словарь экономических и политических терминов» (1954) валкстнэ. Сынь малав пель пинге ульнесть вейкинекс школасо, вузсо, газетасо, журналсо, художественной литературасо покодицятнень туртов.

Те шкас пек питнейть Н. Ф. Цыгановонь исследованиянзо диалектологиянь коряскак. Васняяк, сонзэ мелензэ явовтсть эрзянь кортавкстнэ, кодамо ки сынь ютасть, кодамо ёжост течи. Сех вадря важодевкстнэнь ютксто, конат алтазь неть кевкстематненень, эрявить тешкстамс истяттнэнь: «Из истории вокализма не-первого слога слова эрзянского говора» (1948), «О вокализме не-первого слога слова прогрессивно-ассимиляторного типа говоров эрзя-мордовского языка» (1955), «Гласные первого слога слова в мордовских языках» (1964).

Лезэв мельть-арсемат ёвтась Н. Ф. Цыганов эрзянь ды мокшонь морфологиядонтькак.

Николай Фёдорович пек ламо тейсь кода редакторгак. Сон ульнес Д. В. Бубрихень «Историческая грамматика эрзянского языка (1953), МНИИЯЛИЭ-нь «Трудтнэнь», университетэнь «Учёной запискатнень» редактортнэст вейкекс – теке марто Николай Фёдорович содавикс кода «Од видьме» тонавтнемапелень (1926) автор. 1962-це иестэ лиссь «Грамматика мордовских языков» книгась, зярыя пелькстнэнь эйзэнзэ сёрмадынзе Н. Ф. Цыганов. Лиякс меремс, сон ульнесь авол ансяк лингвистэкс-теоретикекс; сонзэ мелензэ явовтсть прикладной языкознаниянь кевкстематнеяк. Покш Цыгановонь путовксонзо од учёноень ды педагогонь кастомантеньгак.

Н. Ф. Цыгановонь лементь вадрясто содылизь аволь ансяк эсенек республикасо, сонзэ томблеяк. Те секс, мекс сон ламо вийть путсь масторонь финнэнь-угрань кужотнень марто сюлмотнень кемекстамонтень. Ульнесь эрзянь-мокшонь филологиянь паро прявтокс.