Цыганкин Дмитрий Васильевич (1925–2023)

Ожоковонь 22-це чистэ топодевельть бу 100 иеть финнэнь-угрань мастортнэсэ вельть пек содавикс учёноентень, виев тонавтыцянтень эрзянь алкуксонь ломанентень Дмитрий Васильевич Цыганкиннэнь. Сон ламо вийть путсь раськень тевтнес, сиземань апак сода важодсь мокшэрзянь кельтнень тонавтнемаст ды ванстомаст коряс.

Дмитрий Васильевич чачсь Чаунза буень Мокшалей велесэ сокицянь-видицянь семиясо. Васня прядсь сисем иень школа, мейле тонавтнесь Покш Маризь велень средней школасо. 1943-це иестэ эсь олясо тусь фронтов, казезель Отечественной войнань II-це степенень орденсэ. «За отвагу», «За взятие Кёнигсберга» медальтнесэ.

Войнадо мейле прядызе А. И. Полежаев лемсэ МГПИ-нь историко-филологической факультетэнть, 1957-це иестэ – СССР-нь наукань Академиянь языкознаниянь аспирантуранть. Ламо иеть важодсь пединститутсо ассистентэкс, ст. преподавателекс, доцентэкс. 1962–1972-це иетнестэ ульнесь тонавтнемань ды научной роботань коряс проректорокс. Важодсь истя жо Н. П. Огарёв лемсэ госуниверситетэнь филологиянь факультетэнь деканокс, эрзянь ды мокшонь кельтнень кафедрань прявтокс.

Дмитрий Васильевичень лиссть 300 ламо научной важодевксэнзэ, конатнень ютксо монографият, тонавтнема книгат, валкст. Сон кочказель омбомасторонь научной зярыя вейсэндявксонь членэкс-коррепондентэкс, совавтозель омбомасторсо ды Россиясо лисиця зярыя журналонь редколлегияс. Кастась филологиянь кандидатт, докторт. Ламо важодсь раськень тевтнень лангсо.

Д. В. Цыганкин – филологической наукань доктор, профессор, РФ-нь ды МАССР-нь наукань заслуженной деятель, Мордовия Республикань Госпремиянь лауреат. Казезель МР-нь Славань III-це степенень орденсэ.

Кулось Д. В. Цыганкин сундерьковонь 21-це чистэ 2023-це иестэ.