Иван Филиппович Чумаков мокшень писатель и журналист, СССР-нь писателень Союзонь член, народнай образованиянь отличник.
И. Ф. Чумаков шачсь 1913-це кизоня 20-це ноябрьста Пенза аймаконь Карсаевка мокшень велеса. Школать аделамда меле тонафнесь Мордовскяй педагогическяй техникумса, сяда тов шумордазе Мордовскяй государственнай педагогическяй институтть. Ульсь Великай Отечественнай войнаса. Покодсь И. Чумаков «Мокшень правда» газетать редакцияса, коса васенда ульсь литературнай сотрудникокс, а пингонь етазь – отделонь вятикс. Ульсь редакторкс Мордовскяй радиокомитетса, учителькс Краснослободскяй аймаконь Колапа велеса и Узбекскяй ССР-нь Чимбай ошса, Кокандскяй педагогическяй институтса тонафтыкс. И. Ф. Чумаковонди максфоль «Узбекскяй ССР-нь народнай образованиянь отличник» лем.
1972-це кизоста сявомок ульсь научнай сотрудникокс кялень, литературань, историянь и экономикань научно-исследовательскяй институтса.
Васенце стихоц И. Чумаковонь «Паксять мороц» лиссь «Од веле» газетаса 1931-це кизоня – ся пингть тяфта лемневсь «Мокшень правдась». Сяда тов сидеста стихонза и азксонза печатлакшневсть газетаса, «Колхозонь эряф» журналса. Ламотне эздост лисендсть Ив. Чув. псевдоним ала.
1932-це кизоня Москуса нолдафоль «Васень аськолкс» мокшень писательхнень марстонь сборниксна, коза сувасть Иван Чумаковонь вете стихонза. Тяка кизоня Москувонь «Молодая гвардия» издательстваса «Эрект» лем ала лиссь Иван Филипповичень стихонь сборникоц. 1935-це кизоня «Шинь гайф» альманахса печатлафоль «Тумось и поюсь» басняц, 1936-це кизоня Саранск ошса нолдафоль «Розень пакся» омбоце сборникоц, коза сувасть стихотвореният, баснят, «Морот и тефт» сценкась. 1939-це кизоня лиссь азксонь, фельетононь и ёфксонь «Вайгяль» од сборникоц. Лама произведения тяштсь И. Чумаков и Великай Отечественнай войнать пингста: «Встреча», «Дерзость и умение», «В упор по фашистам», «Мастер своего дела» и лама лият.
Содаф сон кода и переводчик. Рузонь кяльста мокшеннети етафтозень М. Горькаень «Мать», Г. Николаевать «Жатва», М. Бубенновонь «Белая береза» и лия роматтнень.
Иван Филиппович Чумаков казьфоль Якстерь Звездань и Отечественнай войнань 2-це степенень орденца, медальса, МАССР-нь Верховнай Советть Президиумонц Почетнай грамотаса и лама лия казнеса.
