Чудайкин Иван Семёнович (1912–1942)

2022-це кизоня топоди 110 киза мокшень поэтти Иван Семёнович Чудайкинонди.

Иван Чудайкинонь лемоц ащи няевикс вастса мокшэрзянь литературать ушедыензон ёткса и тя аф стак, сяс мес сёрмадома тевти кярьмодсь нинге ёфси одкс пингстонза, комозце кизотнень. «Кастама» лем ала стихонь книгац лиссь 1934-це кизоня Москуса, «Художественная литература» издательстваса. Тя ульсь оцю казне аф аньцек мокшень, но и сембе мокшэрзянь литературати.

Эсь стихонзон эса од поэтсь моразень велень эряфть, сонь ломанензон тевснон-койснон, перьфпяльдень природать мазышинц.

Иван Семёнович Чудайкин шачсь 1912-це кизоня Зубово-Полянскяй аймаконь Жарав (рузкс Журавкина) велеса.

1929-це кизоня сон шумордазе велень васенце ступенень школать – тяфта лемневсь эста начальнай школась – и сяка кизоня тусь Саранск ошу тонафнема Мокшэрзянь педагогонь техникуму, коса и кельговсь тейнза мокшень литературась. Педтехникумть шумордамда меле Иван Чудайкин покодсь эсь велесонза учителькс, сяльде сявозь литсотрудникокс райгазетав. А ёфси войнада инголе, 1941-це кизоня, путфоль редакторкс «Комсомолонь вайгяль» газетав, коста и сявозь фронту.

Жарав велень ялганза, сире тядяц и аканза-сазоронза, азонкшнезь, кле, Иван Семёнович 1942-це кизоня повсь партизанскяй отряду, ульсь тоса, кода и армияса, политкомиссаркс. Врагть каршес фкя бойса стакаста ранендафоль и повсь фашисттнень кядьс. Сят ламос муцясть эсонза, но кургстонза исть куле фкявок вал партизаттнень колга – коса эряйхть, мзяра эздост, мезе тиендихть… Сотнезь сери пичес, и сянь алу крьвястсть толмар. Пингта инголе куломась лоткафтозе кайгомда поэтть ару вайгяленц.

И. С. Чудайкинонь стихонза печатлакшневсть мокшень газетава и журналга, конат пара мяльса ванфтовихть А. С. Пушкинонь лемса Национальнай библиотекань национальнай и краеведческяй отделонь фондса. Лама материал поэтть колга мутама Т. Ф. Сафонова-Телинань «Штыкса и пераса» книгастонза, ков кочкаф мокшэрзянь поэттнень и писательхнень, Великай Отечественнай войнань участникнень колга автобиографическяй материал. Стане жа Иван Семёновичень творчествац ванондови школаса, сонь биографияц и произведениянза сувасть мокшэрзянь учебникнененди-хрестоматиятненди. Мокшень поэтть литературнай киц крхкаста няфтеви «Ваймонь лихтибрят» книгаса, кона ащи козя паршикс минь лувиеньконди.