Чернов Евгений Игнатьевич

Таштамковонь 12-це чистэ топодевельть бу 85 иеть критикентень, литературоведэнтень, педагогонтень, филологиянь наукань кандидатонтень, профессоронтень, Мордовия Республикань высшей школань заслуженной важодицянтень – Евгений Игнатьевич Черновнень.

Чачсь сон Чаунза ёнксонь Мокшолей велесэ. Школань прядомадо мейле тонавтнесь Н. П. Огаревонь лемсэ университетэнь филологической факультетсэ, эрзянь келень ды литературань отделениясо. Прядызе факультетэнть – кадызь аспирантурас.

Кавто иеть служась армиясо, седе мейле, 1964-це иестэ, поладызе диссертациянзо лангсо важодеманть. Научной руководителезэль Василий Владимирович Горбунов, содавикс учёноесь. Колоньгемень иельть Евгений Черновнень, зярдо тензэ максозель филологиянь наукань кандидатонь лемесь. Сон ладязель университетэнь эрзянь, мокшонь кельтнень ды литературатнень кафедрань прявтонь тевтнень ветицякс. 1972-це иестэ Евгений

Игнатьевичень кочкизь советской литера­турань кафедрань доцентэкс, 1991-це иестэ макссть профессоронь лем, 1993-це иестэ саезь сон финнэнь-угрань литературатнень ка­федрань прявтоль.

Е. И. Чернов анокстась-сёрмадсь вузсо ды школасо тонавтницятненень литературань коряс зярыя программат, нолдась ламо методической пособият, учебникть, хрестоматият, ды ялатеке наукань тевсэнзэ сехте покш ды неявикс таркасо ашти эрзянь ды мокшонь драматургиясь. Республикасонок арасель лия истямо учё­ной, кона алтаволь те тевентень истя ламо научной важодемат, конатнесэ эрьва ёндо ванкшнызе умонь шкань ды неень драматургиянть.

Е. И. Черновонь «Годы и конфликты» (1981) монографиясонзо, малав ниленьгемень статьянзо.

Пек неявикс важодевкстнэнь ютксо – «Драматурги Мордовии» (1991) монографиясь, кона арась тонавто­мань вадря пособиякс, нолдазель тевс республикань школатнесэ, вузонь филологиянь факультетнэсэ. Те монографиясь целанек алтазель минек раськень националь­ной драматургиянтень. Эйсэнзэ онкстневи-ванкшнови драматургиянть касомань лувозо, максови од питне ташто тонадовозь мельтненень ды седеймарязь кортави сеть произведениятнеде, конат кеместэ сюлмазь шканть, историянть, минек раськенть уцясканзо марто. Евгений Игнатьевич кецневтинзе мокшэрзянь литературань вечкицятнень «История мордовской литературы» (1993) учебной пособиясо, конась нолдазель гуманитарной факультетнэнь туртов. Тосо ёвтневи ми­нек литературань ушодкстнэде, неень шкадо, максовить зярыя содавикс писателень творческой портретт.

Важодсь учёноесь «Писатели Мордовии» (2001; 2015) биоблиографиянь-справочникенть тееманзо лангсо. Кортась сеедьстэ эрзянь ды мокшонь литературатнень тевтнеде радиосо ды раськень телевидениясояк. Ульнесь кандидатонь диссертациянь идемань кавто советэнь член (университетсэ ды пединститутсо).

Е. И. Черновонь аспирантонзо эйстэ лиссть ламо паро учёнойть, конат поладыть мокшэрзянь литературань касомасо-кепетемасо важодемаст.