Черапкин Иосиф Григорьевич

Черапкин Иосиф Григорьевич содаф мокшень ученай-языковед, педагог, общественнай деятель.

Шачсь Мордовия Республикань тяниень Инсар аймаконь Исапря велеса 15-це ноябрьста 1884-це кизоня, сокаень-видиень семьяса.

Пензенскяй учительскяй семинариять аделамда меле покодсь Исапря велень начальнай школаса. 1911-це кизоня экстернакс кирдезень гимназиянь экзаметтнень Владивосток ошса. 1914-це кизоня кармась тонафнема Московскяй университетонь историко-филологическяй факультетса. Тоса сон маладсь воляшинь колга арьси студенттнень мархта и сяс савсь мзярошка пингс тумс лия мастору. Эмиграцияста мрдамда меле 1915-це кизоня сявфоль армияв и прважафоль рузонь-германскяй фронту. 1917-18-це кизотнень – Инсарскяй уезднай исполкомонь председатель. Ульсь Гражданскяй войнаса.

1923–1927-це кизоть самс покодсь Пензенскяй педагогическяй техникумонь мордовскяй отделениянь преподавателькс, Пензань губернскяй народнай образованиянь отделть видеса национальнай меньшинствань тонафнемань Советть председателькс. «Од веле» («Новое село», г. Пенза) газетаса ответственнай секретарь. 1927–1929-це кизотнень ульсь Саратовскяй государственнай университетонь мордовскяй кялень и национальнай культурань отделенияса преподавателькс. 1929-це кизоня ульсь вятикс Мордовскяй округть эзга ётафтови историко-этнографическяй и фольклорнай экспедициятненди. 1930-це кизоня – учебнай частень заведующай и мокшень кялень тонафтыкс Саранскяй педагогическяй техникумса. 1933-це кизоста сявомок МКНПИ-нь кялень секциянь научнай сотрудник. И. Г. Черапкин васенцесь мордовскяй языкознанияса тись классификация мокшень диалекттненди – «Ингольдень Пензенскяй губерниянь мордвать-мокшетнень диалектсна», кона лиссь 1930-це кизоня. Сон сёрмадозень васеньце мокшень кялень учебникнень.

«Мокша-мордовско-русский словарь с грамматическим справочником» (1933); «Мокшень кялень грамматика. Морфология». Васеньце пялькссь: средняй школаса тонафнема книга (1933); «Мокшень кялень грамматика. Синтаксис». Омбоце пялькссь: средняй школань 6 и 7-це класса тонафнемань учебник (1934); «Мокшень кяль: лафчста сёрмас содаеньди тонафнема книга» (1934, 1937) и лама лия учебно-методическяй пособият.

Иосиф Григорьевич Черапкин ульсь 1-це, 2-це, 3-це кялень научнай конференциянь пуроптыкс, конатнень эса ванондовсть мокшэрзянь кялень нормань тиема кизефксне. Сон казьф Св. Станиславонь, Св. Аннань орденца, 3-це и 4-це степенень Георгиевскяй крёзса.

Кулось 1935-це кизоня 18-це мартста Саранск ошса.