Борис Ефимович Кирюшкин – литературовед, критик, филологическяй наукань кандидат, СССР-нь Писателень союзонь член, Великай Отечественнай войнань участник.
Б. Е. Кирюшкин шачсь 1918-це кизоня август ковонь 24-це шистонза Краснослободскяй аймаконь Колапа мокшень велеса учителень семьяса. Эсь велесонза аделась начальнай школа, сяльде – Мамолаева велеса крестьянскяй од ломанень школаса получась сисем классонь образования. Курокста Кирюшкиттнень семьясна тусть эряма Алтайскяй краи. Тоса Б. Кирюшкин аделазень васенда педтехникумть, а меле Барнаульскяй учительскяй институтть. Аф ламос покодсь велень школаса учителькс.
1940–1945-це кизотнень Б. Е. Кирюшкин ульсь Советскяй Армияса. Сон ётась войнать пачк васенце шиста сявомок мекольцети молемс, аф кржа кяльсь толу кида-янда. Ульсь танкань командиркс. Кода батальононь комсорг, ротань командирти политчастень коряс заместитель, вятсь политработа воиттнень ёткса.
Б. Кирюшкин казьф «За победу над Германией в Великой Отечественной войне 1941–1945 гг.» медальса.
Фронтста Кирюшкин мрдась шачема краезонза, Мордовияв. Шумордазе А. И. Полежаевонь лемса Мордовскяй пединститутть кялень и литературань факультетонц, сяльде – аспирантурать. Улема институтса тонафнемста и сась Б. Е. Кирюшкинонди научнай тевти кельгомась. 1947-це кизоня «Красная Мордовия» газетаса печатлафоль васенце статьяц. Од критиксь ванондозе М. А. Бебанонь «Лаймоса толхт» поэтическяй сборниконц. Тяда меле коль сяда сидеста республикань газетатнень и журналхнень эса кармась появакшнема сонь лемоц.
Аф фкя киза Борис Ефимович ульсь партиянь Мордовскяй областной комитетонь лекторкс, лекторскяй группань вятикс.
1953-це кизоста сявомок и мекольдень шинзон самс учёнайть эряфоц и творчествац кемоста сотфоль кялень, литературань, историянь и экономикань Мордовскяй научно-исследовательскяй институтть мархта. Ульсь руководителькс литературань секторса, лама тись од научнай кадрань касфтомаса. Статьянзон, научнай работанзон эса кепсезень аф аньцек мокшэрзянь, но и лама национальнай литературань кизефкснень. Сембоц сон сёрмадсь сядонга лама литературно-критическяй статья.
Б. Е. Кирюшкин васенцекс кярьмодсь мокшэрзянь романть сембе ширде тонафнеманцты. «Мордовский советский роман» (1965) монографияц – сембода оцю исследованиясь национальнай литературоведениясонк романонь жанрать колга. Книгась научнай, но сёрматф шарьхкодеви, тёждя кяльса. Сяс сонь мяль вельде морафтсы аф аньцек специалистсь, но и эрь лувись. Ученайть тя книгац получась цебярь питне литературоведенияса. Сяда оцю работанзонды Б. Кирюшкинонь эряви лувомс «Мордовский исторический роман» (1976), «Формирование нового жанра» (1980). Кода автор и редактор оцю вий путсь колма томса «История мордовской советской литературы» анокламаса. Ученайсь – соавтор «Очерк истории мордовской литературы» (1956), 6 томонь «История многонациональной советской истории» (5 т., 1974) книгатненди. Сонь лезксонц вельде лиссть М. Е. Евсевьевонь трудонза, З. Ф. Дорофеевонь кафта томса «Кочкаф произведениянза», мокшэрзянь фольклорть лама томонза. Ученайсь ульсь мокшэрзянь литературать коряс тонафнемань и морафтомань книгань составителькс.
Борис Ефимович Кирюшкинонь книганзон, научнай трудонзон коряс тя пингс тонафнихть тежятть студент и школьник.
