Бикбаев Хафиз Ибәтулла улы

10 июльдә рәссам, педагог, Россия Рәссамнар берлеге әгъзасы (1996), Мордовия Республикасының атказанган мәдәният хезмәткәре (2007), хәзерге Мордовия Республикасы Лямберә муниципаль районы Инят авылында туган Хафиз Ибәтулла улы Бикбаевның (1959) тууына 65 ел тула.

Хафиз Ибәтулла улы Саранск балалар сәнгать мәктәбендә укый (1971–1974, педагоглары П. Ф. Рябов, В. И. Петряшов, Е. А. Ноздрин). Казан сәнгать училищесын тәмамлый (1979, Б. И. Майоров, А. К. Закиров, Д. Ш. Шәймардановада укый). Укуын И.К. Зариповта дәвам итә.

1985 елдан Саранск шәһәренең 2 нче балалар сәнгать мәктәбендә, Ф. В. Сычков исемендәге Саранск сәнгать училищесында укыта. Рәсем сәнгате, рәсем һәм композиция кебек фәннәрне өйрәтә.

Натюрморт, тематик картина, портрет, пейзаж, интерьер жанрларында эшли. Бикбаев иҗатына кешенең шәхси тормышына, иске әйберләргә кызыксыну, йомшак колорит хас.

Рәссамның төп әсәрләре: «Иске татар йортында интерьер» (1987), «Авыл натюрмортлары» (1988), «Әби әйберләре», «Кышкы кич» «Минем остаханәм» триптихы, «Ата-бабаларым җирендә», «Гөмбә һәм карлыган белән натюрморт», «Уллар» (1994), «Бал чоры» (2000), «Арыш чәчәк ата», «Зәңгәрсу февраль», «Көз» (2001), «Яз» (2008; ДШИ һәм ДХШ педагогларының Республика конкурсында 1 дәрәҗә дипломга лаек була).

Күргәзмәләрдә (1983 елдан), шул исәптән төбәк (Киров шәһәре, 1998), Бөтенроссия (Мәскәү шәһәре, 2004), Халыкара (Саранск, 2007) күргәзмәләрдә катнаша. Шәхси күргәзмәләре Саранскида (1995, 2014) уздырыла. Мордовия буенча даими рәвештә иҗади сәяхәтләр ясый.

Х. И. Бикбаевның әсәрләре С. Д. Эрьзя исемендәге Мордовия Республикасы сынлы сәнгать музеенда, Россия, АКШ, Франция, Финляндиянең шәхси коллекцияләрендә саклана.

Мордовия Республикасы Хөкүмәтенең Мактау грамотасы (1996), РАХ Рәхмәте белән бүләкләнгән (2017).