Азрапкин Юрий Никитич (1939–1996)

Юрий Никитич Азрапкин шачсь Краснослободскяй аймакса Колапа мазы мокшень велеса 1939—це кизоня 15—це октябрьста. Нинге школаса тонафнемстонза варчсезе стихонь тяшнеманц. Оцю класснень эса сонь тонафнезе мокшень содаф писательсь и журналистсь Иван Филиппович Чумаков, кона ся пингть покодсь Колапань средняй школаса. Кемонце класса Юранди Иван Филиппович мярьгсь: «Тейть эряви молемс тонафнема Мордовскяй госуниверситету. Тоса сяда лац кармат содамост мокшень и рузонь кяльхнень, литературать». Церась стане и тись. Средняй школать аделамда меле поступась Н. П. Огаревонь лемса Мордовскяй государственнай университетонь филологическяй факультетонь мокшэрзянь отделенияв. Тонафнесь аспирантураса. Университетса тонафнемок кармась стихонь сермадома и печатлакшнемост синь «Мокша» журналса и «Мокшень правда» газетаса.

Васенце оцю аськолкс Юрий Азрапкинонь творчествасонза арась «Павазсь морай» марстонь сборниксь (1964—це кизось), коса печатлафоль стихонь пусмоц. Стихонзон эса эстокиге няевсь эсь лацонь ширец: азонды нюрьхкяняста, эрекста.

Эряф

Эряф!

Кода тямак панце, –

Кицень-янцень сяка ванца.

Эряф!

Эряф!

Коза тямак ёря: эсон

кельгомась тейть – моря.

Эряф!

Инксот сембонь ваксса –

прязень аф ужяльдезь максса!

(«Мокша», 1962, № 6)

Лама стихт Ю. Азрапкин сермадсь иттненди и иттнень колга. Стихонзон эса сон мушенды стама валхт, конат пяк шарьхкодевихть и курокста мяляфтовихть емлатненди.

1966-це кизоня Мордовскяй книжнай издательстваса лиссь Ю. Азрапкинонь «Чак-чак-чак!» васенце сборникоц, коса поэтсь маштозь нежетькшни фольклоронь сюжеттненди, нолясыне тевс валмуворкснень, содама ефкснень, «пацяв» валхнень. Стихонзон эса васьфневихть карань-каршек корхнемат, сяс ламотне эздост шарфтыхть стихотворнай сценка лангс. Лац няевихть лирическяй героензон промозсна. Нят – эрек, весяла итть, конат ерайхть лама няемс, содамс, коза – повсь кенеремс; сяс сидеста повондыхть прябалас, но тянкса пяк аф пичетькшнихть.

Юрий Азрапкинонь книганянза аф оцюфт, а эсост сняра ваймопожф, сняра пеедема и рахама, аф кирдят – тага лувсайть. Лемсновок эреклафтсазь шабать: «Чак-чак-чак!», «Марса Бобикть мархта Марсса», «Шумбрат, вирняй!», «Шись и кшись». «Чак-чак-чак» («Тук-тук-тук») и «Шумбрат, вирняй!» («Здравствуй, лесочек!») книганза нолдафт рузонь кяльса. Синь етафтозень рузонь содаф поэтсь Борис Соколов. Юрий Никитичень стихонза сувафневихть мокшень кялень тонафнема и морафтома книгатненди. 2022-це кизоня Мордовскяй книжнай издательстваса лиссь Ю. Азрапкинонь «Марса Бобикть мархта Марсса» книгац од изданияса.

Ю. Азрапкинонь стихонзон лангс лама мора ладясь мокшэрзянь содаф композиторсь Г. И. Сураев-Королёв. Сон корхнесь: «Азрапкинонь стихонза лувомста моразь моравихть и эслек празь прайхть нотатнень лангс. Козят и содержаниянь ширде…»

Юрий Никитич Азрапкин кулось 1996—це кизоня июнь ковста. Калмаф Самарскяй областень Смышляевка станцияса.

Пяк ужяль: рана тусь поэтсь эряфста. Лама стихоц и азксоц лядсь апак тяштть, педа пес изь панжев сёрмадомань виец, но лядсть сембе пингс колганза ялгань пара валхне, лятфнематне.