Краеведениянь кулят «Шкась. Тевтне. Ломантне»
Арапов Александр Васильевич
(1959–2011)
Сундерьковонь 1-це чистэ топодевельть бу 65 иеть поэтэнтень, публицистэнтень Александр Васильевич Араповнень. Чачсь сон Дубёнка ёнксонь Кенде велесэ тонавтыцянь кудораськесэ. Эйкакшпингезэ ды од шказо ютасть Кобалесэ – аванзо тиринь велесэ. 1977-це иестэ средней школанть прядомадо мейле кармась тонавтнеме Н. П. Огарёв лемсэ МГУ-нь филологиянь факультетсэ, косто ютавтозель М. В. Ломоносов лемсэ Московонь госуниверситетэнь журналистикань факультетэв.
Тонавтнеманзо прядомадо мейле (1983) А. В. Арапов велявтсь тиринь ёнксов, Мордовияв. Важодсь «Мордовский университет» газетань корреспондентэкс, отделэнь редакторокс. 1985-це иестэ саезь эрямозо кеместэ сюлмавсь «Сятко» журналонть марто. Васня ульнесь литсотрудникекс, мейле – поэзиянь отделэнь редакторокс, 2000-це иестэ саезь 2011-це иес топавтсь прявт редакторонь тевенть. Пингстэнзэ паро ёнов полавтовсь журналонть чачозо, эрзянь литературас састь ламо од сёрмадыцят, конат ловить сонзэ эсест тонавтыцякс ды шкинемань киванть ветицякс.
А. В. Арапов сёрмадсь кавто кельсэ – эрзянь ды рузонь. Лиссть «Вайгель» (1990), «Вальма» (1992), «Взмах» (2001), «Мейле» (2006), «Жест» (2010) книганзо. Валморонзо нолдазельть ламо вейсэнь пусмосо, конат лиснесть Саранскойсэ, Московсо, Венгриясо, Финляндиясо, Эстониясо; совасть «Поэзия третьего тысячелетия» Россиянь сехте паро поэттнэнь валморонь пусмонтень ды финнэнь-угрань поэзиянь антологиянтень. Ламот содасызь сонзэ кода рузонь кельстэ эрзянь кельс паро ютавтыцянть ды эсензэ валморо лангс сёрмадовт моронь морыцянть.
1994-це иестэ А. В. Арапов совавтозь Россиянь Сёрмадыцянь вейсэндявксос. Сон – Мордовиянь заслуженной поэт (2003), МР-нь Прявтонь премиянь лауреат (2009), казезь РФ-нь Связень ды массовой коммуникациянь министерствань Почётонь грамотасо (2009).
Сёрмадомась А. В. Араповонь туртов ульнесь оймень вешемакс, эрямонь смустекс ды танстекс. Седейстэ лисиця валморонзо эждить, оймавтыть, лездыть молеме эрямованть весе стакачитнень ды апаротнень лангс апак вано.
Поэтэсь тусь эрямосто 2011-це иень аштемковонь 14-це чистэ. Калмазь Саранскойсэ.
