Александр Степанович Малькин (1923–1976)

Мокшень содаф поэтсь-лириксь Александр  Степанович Малькин шачсь 1923-це кизонь майть 26-це шистонза Атюрьева аймаконь Кяшал велеса. Школать шумордамда меле тусь тонафнема Темниковонь педучилищав. Сяльде аф ламос покодсь школаса учителькс, «Мокшень правда» газетаса, тонафнесь Мордовскяй университетса.

Сонь поэзиянь тяштец менельса кармась цифтордома 1938-це кизоня, мзярда «Мокшень правда» газетать 28-це октябрень номерсонза лиссь «Панжи эряфсь марлювонь садкс» васенце стихотворенияц. Эста тейнза ульсь 15 киза.

1942-це кизоста сявомок поэтсь ульсь Великай Отечественнай войнаса. Аф ваномок войнань сталмотнень лангс, сон мушендсь пинге стихонь сёрмадомс. Войнада меле творчествац стаки вииякшнесь и 1948-це кизоня Мордовскяй книжнай издательствась нолдазе Александр Малькинонь васенце сборниконц «Стихт» лем ала. Сонь творчествац кемоста сотнеф  наротть эряфонц мархта. Седис токай стихонзон, поэманзон и азксонзон эса келиста няфтсть пря мокшень кяльть арушиц и крхка смузец. Поэтсь лама сёрмадсь иттненди. Тяса сон няфнесы прянц кода юморист и сатирик, кона лац содазень шабатнень потмоширеснон, прябаласнон. Эряви азомс, што Малькин сёрмадсь аф аньцек стихт и поэмат, но няфтезе эсь усолонц и прозаса. Газетатнень и журналхнень эса сидеста васьфневихть азксонза и очерконза. Эсь творчествасонза  сон тейнек няеви кода ломань, конац крхкаста содасыне  эряфонь китнень-яттнень, лама стих лемдсь шачема-касома ширть кельгоманцты, зияттнень эзда ванфтоманцты, ломаттнень.

Ёткса ялгаксшить кемокстаманцты. Башка вастса ащихть кельгомать колга стихонза. Поэтсь лац шарьхкодьсы тя таколфты ёжень марямать оцю паронц-асувонц ломанть эряфса, сянкса фалу творчествасонза няфневи пяк вии и мазы кельгома. Кой-кона стихонза ётафтфт рузонь кяльти. Сон кадсь оцю поэтонь седиса-ваймоса сёрматф вии, мялень токай произведеният. Сяс тянемс творчестванц тонафнесазь иттне школаса, тяшнихть колганза дипломнай работат университетса тонафнихне, статьят и диссертацият учёнайхне. Поэтть творчествац кемоста сувась мокшэрзянь литературать историяс. И хоть Александр Малькинонь эряфста тумдонза меле поэзияньке сякокс пуропни од вийхть-вайгяльхть, но эсонза оцю юмафкссь, кода панжи марлюти аф эсь пингстонза синтьф тараткянь сярятьфсь, маряви тячемс… Пингсь моли, поэтть кельгома шуфтонянза Кяшал велеса стаки венепнесазь лопаву тарадснон шинь сюролдатненди. Синь тага шумназевсть, няйф, лятфтазь эсь морайснон ару и валда моронзон:

Косат, косат акша сёрал,
Косат, панжи марлюня?
Коса, коса колган морат,
Сенем сельме аруня?

Материалсь аноклаф А. С. Пушкинонь лемса библиотекань фонттнень коряс.