27-це августста топодсь 95 киза шачема шистонза финноугроведти, лингвистти, профессорти, МР-нь наукань заслуженнай деятельти Александр Павлович Феоктистовонди. Сон шачсь Краснослободскяй аймаконь Заберёзова велеса. Аделазень Краснослободскяй педагогическяй училищать, А. И. Полежаевонь лемса МГПИ-ть, СССР-нь НА-нь языкознаниянь институтть аспирантуранц. Великай Отечественнай войнань кизотнень покодсь «Ёндол» колхозса. 1955–1968 – це кизотнень НА-нь языкознаниянь институтса вятезе финно-угорскяй кялень секторть. 1968–1973-це кизотнень пингста покодсь Моску ошса М. Горькаень лемса Литературнай институтонь художественнай ётафтомань кафедрань старшай преподавателькс, 1990–1992-це – М. Е. Евсевьевонь лемса МГПИ-нь мокшэрзянь кялень кафедраса. 1992-це кизоста сявомок 2005-це кизоти молемс покодсь Н. П. Огаревонь лемса МГУ-нь мокшень кялень, финноугрань и сравнительнай языкознаниянь кафедраса.
А. П. Феоктистов тонафнезень мокшэрзянь письменно-литературнай кяльхнень ладявомаснон, устнай и книжнай поэзиянь форматнень и жанратнень, диалектологиять, лингвогеографиять и ареальнай лингвистикать, кялень сотцемать, лексикологиять. Сёрмадсь 300 лама научнай и учебно-методическяй работа, 7 монографият, 4 валкст, 3 тонафнемань пособият. Аноклась наукань 16 кандидат.
А. П. Феоктистов ульсь финно-угорскяй обществань, финонь литературань, венгрань филологиянь коряс, Урало-Алтайскяй обществань членкс. Казьф лама медальса, тяконь лувфксса «1941–1945-це кк. Великай Отечественнай войнаса доблестнай трудонкса».
