Национальной ды краеведческой литературань отделсэ таго пуромкшность «Краевед» клубов совицятне. Прявт кевкстемакс вастовомасонть ульнесь «Вирявань сурсеме» музыкальной фильма-спектаклянть анокстамозо-теемазо. Сон арсеви путомс, эрзянь ды мокшонь эпической моротнень, кезэрень ёвкстнэнь юрокс саезь.
Путомс истямо спектакля – те ушодксонть теизь ды сонзэ топавтоманзо эсест лангс саизь Саран ошонь МБУК «Дворец культуры г. о. (ДК «Луч») коллективтне: «Вармава» фольклорной ансамблясо, «Ламзурь» народной фольклорно-этнографической ансамблясо морыцятне, национальной ды краеведческой литературань отделсэ важодицятне.
Содавикс фольклористнэнь, этнографтнэнь, историктнень, музыковедтнэнь важодемаст лангс нежедезь, ульнесь ваннозь сценариянть лувозо, покш мель явозель музыкальной пельксэнзэ лангс. Кортазель сень коряскак, кодат оршамот кармить эрявомо налксицятненень, кодат декорацият кармить эрявомо анокстамс сценанть мазылгавтоманзо туртов.
Музыкальной фильма-спектаклянть прявт пельксэкс карми улеме эрзянь свадьбанть перька кезэрень койтнень-кирдатнень невтемась. Те темась пек парсте максови ученой-этнографонть М. Е. Евсевьевень важодематнесэ. Ламо эрявикс ёнкст ульнесть саезь лия ученойтнень материалсто, те – В. И. Рогачевонь монографиятнестэ ды ламонь лиянь, конатне пек лездасть те тевенть теемстэ.
Паро мельсэ тешкстасынек: национальной ды краеведческой литературань отделэнь экспонаттнэнь ютксо ули седикелень сурсеме, конась ашти башка таркасо, лезды седе парсте содамс икелень кудоютконь ули-паротнень..
Седе тов кармить ютамо ламо репетицият, спектаклянть коряс эрьва кодат кевкстемань ванномат.
