Краеведениянь кулят «Пингсь. Тефне. Ломаттне»: Степан Дмитриевич Эрьзянь шачема шистонза 150-це кизонь топодеманцты

Степан Дмитриевич Эрьзя (1876–1959) – Мордовиянь васенце скульпторсь. Сон шачсь 8-це ноябрьста 1876-це кизоня Симбирскяй губерниянь Алатырскяй уездонь Баева велеса сокай-види ломанень семьяса. Алтышева велень начальнай школать аделамда меле шабакскиге, 15 кизоса, ушедсь покодема Шкай ликонянь рисавсикс художникть Ковалинскяень атрельсонза. 1902-це кизоста сявомок 1906-це кизоти молемок тонафнесь Москуса живописень, ваяниянь и зодчествань училищаса. Инголе живописень отделенияса, меле – скульптурнайса. Эрьзянь тонафнезь эстонь пингонь содаф живописецне Н. А. Касаткин, А. Е. Архипов, скульпторхне П. П. Трубецкой и С. М. Волнухин.

20-це векть ушетксста касфнезе маштомашинц скульптурань тиендемаса. Якась Италияв, сяльде Францияв, коса тонафнезень ётай и тяниень пингонь искусствань произведениятнень. А 1909-це кизоста сявомок од скульпторть кармасть ни содамонза марнек масторлангса.

1914-це кизоня С. Д. Эрьзя мрдась Родиназонза. Покодсь Москуса военнай госпитальса. 1915-це кизоти самс инь содафокс произведениянзон эзда арасть мраморста тиф «Монголкась», «Балеринать омбоце Федоровать портретоц».

Эрьзянь творчествац скульптурань тематикань коряс козяль и сувафнесь эсь эзонза кода авань портретт, станя жа и национальнай мифологиянь обраст. Скульпторсь мзярдовок ашезь ёра дивандафтомс шама мазышиса, сонь мялецоль няфтемс ломанть седиень ваймонц, крхка мялензон-арьсеманзон.

1917-це кизоста сявомок и 1926-це кизоти молемок, мзярда Эрьзя эрясь Уралса, ульсть тифт гипсста «Ризф», мраморста «Авань портрет», «Ева» и «Калипсо» произведениянза.

1927-це кизоня скульпторсь тусь эсь работанзон няфтема Аргентинав. Тяса мусь эстеенза покодемс материал – субтропикнень эса касы кебрачо, альгарробо, урундай шуфтт, конат тусть Эрьзянь мяльс сяс, мес пяк кемот и козят фактурань ширде.

Пяк вии, мезьдонга аф пели, ламонь колга корхтай-ёфси шамаликт Степан Эрьзя няфтсь античнай, бибилейскяй, Евангелиянь, мифологиянь героехнень образсснон вельде, конатнень еткста содафт «Медузань пря» (1938 к.), «Мельпомена» (1939 к.), «Моисей» (1932 к.), «Иоанн Креститель» (1928 к.), «Христоссь» (тиема пингоц аф содаф) скульптураттне. Синь тяниень пингс зайняйхть оцю васта скульпторть творчествасонза.

1954-це кизоня Москуса няфтьфтольхть Эрьзянь произведениянза персональнай выставкаса. 1957-це кизоня скульпторсь казьфоль Трудовой Якстерь Знамянь орденца.

Кулось 1959-це кизоня Москуса. Ламоц скульпторть работанза ванфтовихть Саранскяйса МР-нь С. Д. Эрьзянь лемса изобразительнай искусствань музейса. Тяниень пингть кода марнек странаса, тяфта жа Мордовияса ётафтовихть лама илат, конат лемтьф инь содавикс скульпторть С. Д. Эрьзянь шачема шистонза 150 кизонь топодеманцты. Тяконь лувфксса А. С. Пушкинонь лемса Национальнай библиотекаса панчфт выставкат, конатнень эса няфтьф скульпторть эряфонь и творческяй киц. Выставкатнень ули кода ваномс сембонди, кинь ули мялец (604 к., 1 корпус; 2 этаж, 2 корпус).