Краеведениянь кулят «Шкась. Тевтне. Ломантне» Брыжинский Михаил Иванович (1951–2020)

Ожоковонь 6-це чистэ топодевельть бу 75 иеть эрзянь содавикс сёрмадеентень М. И. Брыжинскийнень. Чачсь сон Кочкурова буень Од Мурза велесэ, тонавтыцянь семиясо. Тетязо – Иван Сергеевич пингензэ перть важодсь школасо, ульнесь эрзянь содавикс сёрмадыцякс. Михаил Брыжинский школань прядомадо мейле тонавтнесь пединститутсо, мейле кувать важодсь тиринь велесэ, текень пингстэ сёрмадсь книгат. Сон романонь, повестень, ёвтнемань, тонавтома книгань сёрмадыцяль, рузонь кельстэ виев ютавтыцяль.

«Половт» васенце повестезэ лиссь 1983-це иестэ. Сонзэ эйсэ авторось невти событиятнень, конат мольсть минек ёнкссо ХIII-це пингестэ, ёвтни седе, кода рузтнэнь марто вейсэ эрзятне ды мокшотне тюрсть монголо-татартнэнь каршо.

«Ради братий своих» повестенть Михаил Брыжинский сёрмадызе рузонь кельсэ. Эйсэнзэ ёвтневи Степан Разинэнь прявтсо Равчирень раськетнень Россиянь инязоронь самодержавиянть каршо тюремась. Парсте панжови эрзянь ине аванть, ушмодеенть Алёна Арзамасскаянь образось. Повестесь васенцеде лиссь 1986-це иестэ.

1988-це иестэ лиси «Поклонись борозде» романозо. Велень эрямонть парсте содамось лезды авторонтень видестэ, чарькодевиксстэ невтемс эйсэнзэ ютазь пингенть прядовома шкань эрзянь веленть. Комсь иеде теде икеле уш писателесь ливтсь лангс асатыкстнэнь, конат калавтсть веленть, казямокс тейсть эрзянь ломаненть оймензэ.

1991-це иестэ М. Брыжинскиень лиссь «Эрямодо надобия» ёвтнемань пусмозо. Эйзэнзэ совить колмо ёвтнемат, «Заку-ун» триптихесь ды «Пингень гайть» эссэсь.

Кемголмово иень ютазь «Пингень гайть» эссэсь лиси башка книгасо. Сон алтави раськень темантень. Авторось ёвтни эрзятнень ды мокшотнень кезэрень шкань эрямодост.

2008-це иестэ лиси «Кирдажт» книгазо, козонь «Кирдажт» повесттенть башка совасть «Эретник» повестеськак. Сынст мельспаросо ловныть кода одтнэ, истя сыретнеяк.

Художественной произведениянь сёрмадомадо башка М. Брыжинский ламо вийть путсь рузонь кельстэ ютавтомань а шожда тевентень. Ютавтынзе эрзянь кельс «Мордва» книганть, «Мордовия» энциклопедиянь омбоце томонть. Анокстась школасо тонавтницятнень туртов тонавтома зярыя книгат.

М. И. Брыжинский – СССР-нь Писателень союзонь член (1990 ие), Мордовия Республикань государственной премиянь лауреат (2004 ие), Мордовия Республикань заслуженной сёрмадей (2007 ие), народной сёрмадей (2014 ие).