Краеведениянь кулят «Пингсь. Тефне. Ломаттне»: Юрий Федорович Кузнецовонь 90-це кизонцты

Юрий Федорович Кузнецов шачсь 27-це июньцта 1936-це кизоня Мордовия Республикань Рузаевка аймаконь Мокшень Пишля велеса. Велень школать аделамда меле шумордазе Мордовскяй государственнай университетть филологическяй факультетонц. Студентокс улемстонза ульсь университетскяй литературнай объединениянь активнай участникокс, конанди вятикс ульсь мокшэрзянь содаф поэтсь Артур Моро. 1958-це кизоня Кузнецов работась «Мокшень правда» газетаса, сяда тов 1971-це кизоста сявомок 1981-це кизоти самс – Мордовскяй книжнай издательстваса.

Литературнай творчествати Кузнецов кярьмодсь 50-це кизотнень песта.

Сонь критическяй статьянза, заметканза, очерконза печатлакшневсть республиканскяй газетатнень и журналхнень страницаснон лангса. 70-це кизотнень ушетксста сон арси лирическяй прозань содаф мастеркс.

«Ичкоздень семафор» («Дальний семафор») азксонь васенце сборниконц печатлазе 1972 кизоня, сяда тов нолдафтольхть: «Коряй пайгонят» («Звенящие колокола», 1973), «Сембось ушеткшни киста» («Все начинается с дороги», 1975), «И тага киза» («И снова лето»,1976), «Сексень пизелхт» («Осенние рябины», 1979), «Ожудова, вишке коволхт» («Подождите, быстрые облака», 1981), «Шиньгучка» («Посреди ночи»,1981), «Лувксонь панжемат» («Чистые ключи»,1983) и др.

Ю. Кузнецовонь азксонза и повестенза сотфт социально-нравственнай прябалатнень мархта, эсост шуваняста няфтьф пингонь атмосферась. «Коряй пайгонят» («Кайги пайгонят») повестьсонза поэтти удалась эрекста няфтемс шачема-касома краенц, велень ломаттнень, коса сон ётафтозе идькс пингонц и одкс пингонц. Лувись ушеткшни марямонза прянц аф ширдень ваныкс, а соучастникокс сянди, мезе тиендеви повестьса.